(Díli), kampus central 09/07/2026- Universidade Nasionál Timor Lorosa’e (UNTL) hamutuk ho Estudante Universitáriu Timor-Leste (EUTL) sira halo konferénsia imprensa ho lian ida ne’ebé firme maibé pasífiku, organizasaun ne’e aprezenta demanda prinsipál neen ba Governu no Parlamentu Nasional, ne’ebé konsidera hanesan preokupasaun bo’ot ba estudante no sosiedade tomak.
Iha konferénsia imprensa ne’e, porta-voz EUTL Natalizio nunes martins hatete organizasaun ne’e hakarak haree mudansa ne’ebé responde ba nesesidade povu, liu-liu iha área liberdade sivíl, ekonomia no dezenvolvimentu nasional.
“Ami husu Parlamentu Nasional no Governu atu fó prioridade ba interese públiku no halo desizaun sira ne’ebé responde ba nesesidade komunidade, liu-liu estudante, juventude no povu tomak,” dehan porta-voz EUTL Natalizio nunes martins iha kampus cental 09/07/2026.
Demanda dahuluk relasiona ho Projetu Lei Aditamentu kona-ba Kriminalizasaun Difamasaun. EUTL husu Parlamentu Nasional atu haree didi’ak projetu lei refere atu garante liberdade espresaun no liberdade imprensa la hetan limitasaun ne’ebé bele prejudika direitu sidadaun sira.
Pedidu daruak mak alterasaun ba Lei Liberdade Reuniun no Manifestasaun (Lei n.º 1/2006), atu asegura ema hotu bele uza direitu konstitusionál atu halo reuniaun no manifestasaun ho forma livre, pasífiku no responsavel.
Organizasaun ne’e mos manifesta preokupasaun kona-ba aumentu taxa no tarifa balun, ne’ebé konsidera aumenta todan ba moris povu tuir EUTL, Governu presiza halo avaliasaun ba politika fiskál no ekonomia atu hamenus impaktu ba komunidade.
Sorin seluk ne’ebé sai preokupasaun mak aumentu folin mina, tanba afeta diretamente kustu transporte, atividade ekonomia no folin sasán báziku iha merkadu.
Aleinde ne’e, EUTL mos husu Governu no Parlamentu Nasional atu revê Lei Subvensaun ba Partidu Polítiku sira, atu garante utilizasaun osan públiku ne’ebé transparente no responsavel. Organizasaun ne’e mos propoin atu Governu hasa’e Orsamentu Jeral Estadu (OJE) ba setor produtivu hanesan agrikultura, peskas no indústria, atu kria empregu no hametin ekonomia nasional.
Maske aprezenta kritika ba politika balun, EUTL reafirma katak organizasaun ne’e sei kontinua fó prioridade ba diálogu.
“Ami sei kontinua uza dalan diálogu no komunikasaun ho autoridade kompetente maibé karik la iha resposta ne’ebé satisfatóriu, ami sei realiza asaun pasífiku ka manifestasaun iha tempu besik, tuir lei no prinsipiu demokrátiku,” hatete porta-voz EUTL.
Konferénsia imprensa ne’e remata ho apelu ba Governu no Parlamentu Nasional atu loke espasu diálogu ho estudante no sosiedade sivil, atu hamutuk buka solusaun ba asuntu sira ne’ebé atualmente sai preokupasaun públika.
Jornalista/Estajiária: Josefina Maria
Editor: Ana Maria
