Dili (14/05/2026) – Kapasidade no integridade jornalista nian sai fali kestaun sentrál iha diskusaun kona-ba dezenvolvimentu média iha Timor-Leste. CEO/Nain ba Grupo Media Nasional (sigla -GMN) Jorge Serrano, fó hanoin katak sai jornalista profisionál la’ós de’it kona-ba titulu servisu, maibé kona-ba oinsá kumpri kritéria no étika ne’ebé loos.
Nia deklara, realidade iha terrenu hatudu katak jornalista barak mak seidauk komprende didí’ak sira-nia knaar nu’udar profisionál. no iha mundu modernu, jornalista ida la presiza hein nafatin orientasaun husi Xefe Redasaun ba buat hotu, maibé tenke iha inisiativa rasik ba asuntu sira nebe’e atu halo kobertura.
”Ita-nia jornalista barak seidauk komprende no seidauk halo tuir kna’ar profisionál. Se ita ko’alia ona profisionál, ita tenke tuir kritéria. La presiza hein orientasaun husi Xefe Redasaun, nia (jornalista) tenke hatene rasik saida mak nia atu halo,” dehan Serrano iha seremonia Dili Dialogue Forum iha salaun Multioso GMN Bebora foin lalais.
Serrano mós kritika prátika “copy-paste” plagiarismu ne’ebe kbiit foti notísia ne’ebé hanesan de’it entre média sira. Nia observa katak dalaruma jornalista sira bá kobre eventu ida ho “rame-rame”, maibé rezultadu notísia nian laiha diferensa fundamentál, troka de’it títulu maibé isin notísia (Body News)hanesan hotu.
Aleinde kualidade tékniku, Jorge Serrano kestiona mós kona-ba responsabilidade sosiál husi média sira. Iha situasaun rai-laran ne’ebé sensivel, média iha obrigasaun bo’ot atu fó informasaun ne’ebé loos no klaru, la’ós hodi kria fali konfuzaun.
”Média profisionál iha obrigasaun atu koalia ba públiku ho responsabilidade. Ita bele públika buat hotu, maibé tenke buat ne’ebé loos,” nia tenik.
Iha ninia diskursu enfatiza katak média la’ós de’it fó sai informasaun, maibé tenke sai parseiru ba pas no estabilidade nasionál. Média ne’ebé profisionál mak média ne’ebé hatene ninia pozisaun hodi kontribui ba dezenvolvimentu estadu nian liuhusi informasaun ne’ebé kualidade no edukativu.
jornalista/estjiada :Sandra
Editor : Ana Maria
