(Díli), Caicoli 18/05/2026 – Grupu ida ne’ebé konsidera an rasik nu’udar vítima no ema afetadu husi konteúdu iha livru ida ne’e hato’o preocupasaun ba Komandante Jeral PNTL no husu atu autoridade relevante sira halo esforsu hodi suspende publikasaun no produsaun tan ba livru refere.
Iha enkontru ho Komandante Operasional PNTL, Superintendente Armando Monteiro, reprezentante grupu ne’e hateten katak publikasaun livru refere bele afeta estabilidade sosial no harmonia entre komunidade sira.
“Livru ida ne’e kontinua afeta estabilidade entre ema ho ema no mos desarmoniza relasaun entre pesoal no komunidade sira,” hateten Sr. Luciano Maubere durante enkontru ho Komandante Jeral PNTL iha kaikoli Dili.
Nia Relata informasaun ne’ebé hato’o no rekomenda atu suspende publikasaun livru ne’e bazeia mós ba orientasaun husi Chefe Estadu Maior Jeneral F-FDTL, Tendente Jeneral Falur Rate Laek, ne’ebé iha fulan Novembru tinan kotuk rekomenda ona katak livru refere presiza suspende no labele halo revisaun ka produsaun tan.
“Depois de ami nia sorumutu ho maior jeneral, nia rekomenda katak livru ida ne’e tenki suspende no labele halo review ka cetak tan,” dehan Luciano.
Grupu ne’e mós refere katak Ministériu Assuntu Kombatente Libertasaun Nasional oficialmente anula ona estatutu autor livru ne’e nian nu’udar herói nasional.
Nia salienta tanba ne’e, grupu afetadu sira husu ba autoridade seguransa Timor-Leste atu halo koordenasaun diplomátika ho República Indonézia, liu husi adidu kultura no edukasaun Indonézia iha Díli, hodi notifika publisher iha Flores no percetakan iha Jakarta atu labele halo revisaun ka produsaun tan ba livru refere.
“Ami husu ajuda husi Estadu Timor-Leste liu husi parte seguransa para bele hato’o notifikasaun ba publisher/percetakan iha Indonézia atu labele halo produsaun tan ba livru ida ne’e,” nia dehan
Maske konsidera an nu’udar vítima husi konteúdu iha livru ne’e, grupu afetadu sira afirma katak sira hili dalan dame no la uza violénsia atu hato’o sira nia preocupasaun.
“Mesmu ami sai vítima ba livru ida ne’e, ami hatudu vontade di’ak no la uza violénsia ruma,” hateten nia.
Durante enkontru Komandante Jeral PNTL apresia atitude grupu ne’ebé prefere rezolve kestaun ho maneira pacífika no promete sei halo esforsu atu livru ne’e labele kontinua iha publikasaun.
Jornalista estajiada :Domingas/ Caryn
Editor :Ana Maria da Silva
