(Dilí) Santa-Cruz- Marcelino da Silva, ho idade (68) kontinua luta loron-loron atu sustenta nia moris mesak iha área Taibesi, Dili. Orijinalidade husi Ossu, Postu Administrativu Ossu, Suco Ossu, aldeia Belas, Munisipiu Viqueque.
Marcelino hatete maske la iha kapital boot atu hahú negósiu ne’e,maibe nia komesa ho osan ki’ik atu fa’an malus, ne’ebé nia prepara rasik. dadaun, nia hili atu fa’an iha estrada ninin sira iha Taibesi, tanba kompetisaun iha merkadu a’as tebes no ema barak fa’an produtu hanesan.
“Hau la iha osan barak atu hahú negósiu boot, maibé hau komesa deit ho ne’ebé hau iha. Importante mak labele para atu fa’an,” dehan Marcelino iha santa Cruz ba Média mudansa.
Durante tinan rua ikus ne’e, nia hela mesak deit iha Dili no dala barak fila ba foho atu ku’u malus hodi lori mai fa’an iha sidade. Rendimentu loroloron la fixu, maibé nia bele hetan to’o dolar 20 iha loron ida, no iha fulan ida bele to’o dolar 100.
“Dala ruma hetan ki’ik, dala ruma di’ak liu. Maibé hau agradece tanba bele sustenta moris loroloron,” nia hateten.
Marcelino afirma katak maski moris susar, nia família seluk kontinua fó motivasaun ba nia,servisu nee mak ajuda sustenta uma laran, maski nia ferik oan mate ona tinan tolu liu ba no agora nia hela mesak iha Dilí-Taibesi.
Nia realta kada loron,sai husi uma tuku 7 dadeer no fila fali tuku 6 lokraik manu tun rai. Durante fa’an iha dalan, problema boot ne’ebe nia hasoru maka kondisaun klima tempu udan no loron manas sai dezafiu bo’ot ba nia tamba lao ain deit.
“Se udan ka loron manas tebes, ema sosa menus, maibé hau tenki kontinua tanba nee hau nia moris,” dehan tan Marcelino.
Ba futuru, nia iha planu atu aumenta nia negósiu ho fa’an tabaku no bua-ahu atu bele aumenta tan rendimentu.
“Hau hakarak aumenta negósiu ki’ik-ki’ik, atu iha rendimentu liu tan ba sustenta hau nia moris,” nia planu.
Istória Marcelino nian hatudu katak maski idade avansa, ho esforçu no vontade forte, ema sei bele kontinua luta atu sustenta moris no buka dalan ba futuru ne’ebé di’ak liu.
Jornalista :Olersio de Carvalho
Editor :Manuel Andrade
