(Dili, Balide, 06 Marco 2026) – Iha tempu ne’ebé ema barak preokupa ho sira-nia saúde hodi halo tratamentu, maibé iha Timor oan barak mak ho hanoin kreativu hodi transforma Produtu Natural Mina Aloi Vera Oil hodi atrai atensaun komunidade no fó esperansa ba tratamentu alternativu.
Tuir CEO Aloi Vera Oil, Aquina Cardoso Do Santos hatete, Produtu ne’e hahú husi esperiénsia pesoál proprietária, no iha motivasaun atu loke negósiu tamba nia oan rasik hetan problema fu’uk la moris durante tinan tolu. Depois uza mina ne’e ba fulan ida, nia oan nia fu’uk komesa moris fila fali.
CEO Aloi Vera Oil, Aquina Cardoso Do Santos, Imajen Zeferino da Silva
“Primeiru ha’u halo tamba ha’u nia oan, ha’u la hanoin atu fa’an, maibé wainhira ha’u haree rezultadu diak, ha’u komesa fiar katak mina ne’e iha benefísiu tebes, la’ós deit ba problema fu’uk, ha’u mós tenta kose ba ha’u aman ne’ebé moras isin katar, depois kose mina ba parte isin lolon nian durante 30 minutu, katar ne’e menus no nia aman senti di’ak liu”. Dehan CEO Aloi Vera Oil, Aquina Cardoso Do Santos iha estudiu Média Mudansa foin lalais ne’e.
Mana Akeh hatete katak média sosial hanesan YouTube no TikTok ajuda tebes nia atu aprende kona-ba produtu natural sira. Nia estuda husi informasaun sira ne’ebé iha internet kona-ba kombinasuan Aloi Vera, virjen coconut oil (mina nuu original) no ai-funan kenanga (cananga odorata).
“Maski seidauk halo teste laboratóriu, maibé ami haree husi experiénsia konsumidór sira katak produtu ne’e fó rezultadu di’ak. Iha inísiu, ha’u produs deit botol neen ho kapitál rasik. Aloi vera no mina virjen halo rasik, no bunga kenanga hetan husi kolega sira. Agora, ami fa’an botol boot ho presu $10.00 no botol ki’ik ho presu $7.00. Maski iha konsumidór sira konsidera folin aas, prosesu produsaun naruk no presiza ingredienti natural ne’ebé kualidade di’ak.” Nia hatete
CEO hatutan desafiu boot ne’ebé sira hasoru mak tempu udan, tamba material hanesan nuu no lidah buaya la dun iha kualidade di’ak bainhira tempu la favorável. Maibé agora, negósiu ne’e la’ós deit produs Aloi Vera Oil, maibé mos virjen coconut oil ne’ebé bele uza ba han, ba tratamentu isin no sai hanesan skincare natural.
“Ita labele tauk atu hahú buat ruma, tenki iha mehi no esforsu atu ba oin, fiar ba an rasik importante liu. Labele sai beban ba família, maibé tenki sai forte iha família, tamba ema dehan, feto forte, nasaun forte.” Nia hakotu
Negósiu ki’ik ida ne’e hatudu katak husi esperiénsia pesoál no esforsu kontinua, bele mosu oportunidade atu ajuda an rasik no komunidade.
Jornalista : Francisco Pereira/ Jorgina Maia
