(Bobonaro) Balibo-Sekretaria Estadu Komunikasaun Sosiál (SECOMS sigla português) inaugura Edifisiu Rádiu Komunidade Fronteira Balibo Five (5) hodi fó omenajen ba jornalista australianu nain 5 ne’ebé mak lakon sira nia vida iha Balibo tanba defende lia loos no direitu povu Timor-Leste nian.
Sekretariu Estadu Komunikasaun Sosiál (SECOMS sigla português), Expedito Loro Dias Ximenes, hatete, edifísiu rádiu ne’e istóriku tebes tanba iha tempu defisil jornalista nain lima (5) husik hela sira nia servisu no família ho sakrefisiu bo’ot hodi defende lia loos.
“Edifísiu ida ne’e nakonu ho istória tanba ita hotu hatene katak iha tempu defisil jornalista nain lima (5) husi hela sira nia servisu no sira nia família ho sakrefisiu bo’ot hodi defende lia loos, defende ita nia liberdade no defende direitu povu Timor-Leste nian, tanba ne’e mak edifisiu ida ne’e ita tau naran Rádiu Komunidade Fronteira Balibo 5, atu ita fó omenajen fó ita nia respeitu ba ita nia jornalista nain lima (5)”, esplika Sekretaria Estadu Komunikasaun Sosiál, Expedito Loro Dias Ximenes, bainhira halo lansamentu ba Rádiu Komunidade Fronteira Balibo 5, iha Balibo, Kuarta 15/10/2025.
SECOMS hatutan, Rádiu komunidade nia papel prinsipal mak atu atende atividade komunidade nian.
“Rádiu komunidade sira nia papel importante mak atu atende atividade komunidade nian, la signifika katak dirijentes estadu nian la halo, maibé ha’u sempre fó hatene ba rádiu komunidade sira iha munisípiu hotu-hotu katak se bele 60% ba atividade komunidade nian no 40% ba atividade estadu ka governu nian”, afirma nia
Governante ne’e mós dehan, dau-daun ne’e rádiu komunidade iha Timor-Leste hamutuk 22, no iha tinan oin sei apoia tan rádiu komunidade rua (2) iha Munisípiu Baucau, Postu Administrativu Baguia no Munisípiu Civalima, Postu Administrativu Fatumea.
“Agora rádiu komunidade ne’ebé mak ita rejista iha rua nulu resin rua (22), planu iha tinan oin ita sei apoia tan rádiu rua (2) iha Baguia no Fatumea, ne’ebé mak sira nia proposta mai ona no iha fulan oin ekipa sei ba halo survey fatin hodi hare’e katak bele ka lae rádiu komunidade hari’i iha ne’eba”, nia salienta.
Iha fatin hanesan, Administrador Postu Administrativu Balibo, Casimero dos Santos hatete, edifisiu ida ne’ebé mak durante ne’e sira hein ho esperansa bele realiza no hetan ona lansamentu husi Sekretaria Estadu Komunikasaun Sosiál.
“Edifisiu foun ida ne’ebé mak durante ne’e ami hein ho esperansa, ohin bele realiza duni no halo lansamentu, agradese ba IX governu ne’ebé mak rona duni ami komunidade Postu Balibo nia halerik ohin loron rádiu ne’e bele hari’i duni iha Balibo”, dehan Administrador .
Nune’e, Jestór Rádiu Komunidade Fronteira Balibo 5, Samuel dos Santos Soares, informa, rádiu ne’e ho naran Balibo 5 tanba iha jornalista nain lima (5) ne’ebé mak lakon sira nia vida iha Balibo tanba Timor-Leste nia ukun rasik an.
“Rádiu ne’e ho naran Balibo 5 tanba ita hotu hatene katak jornalista nain lima (5) ne’ebé mak lakon sira nia vida iha fatin ida ne’e tanba hakarak espalla informasaun kona-ba ukun nain sira nia sakrefisiu ba ita nia ukun rasik an”, Jestor ne’e hatete
Enkuantu iha difikuldade ne’ebé mak prezudika mós sira nia servisu tanba menus ekipamentus no sira nia sekuensia rádiu ne’ebé mak labele perkore iha Balibo laran tomak tanba liña internet ne’ebé mak la di’ak.
“Ami iha de’it komputador ida hodi halo servisu, ami iha mós problema kona-ba sekuensia rádiu ne’ebé labele perkore Balibo laran tomak, tanba liña internet ne’ebé la di’ak, maibé nu’udar jestór iha tempu badak nia laran ha’u sei halo pedidu ida ba iha SECOMS atu bele rezolve problema sira ne’ebé mak ami enfrenta, atu nune’e ita bele garante katak rádiu ida ne’e bele sai di’ak liu tan iha futuru”, dehan nia.
Nune’e nia hatutan, rádiu komunidade ne’e hari’i atu servi nka komunidade sira
“Rádiu komunidade ita hanaran komunidade katak husi povu ba povu no fila fali ba povu, la signifika katak ami hirak ne’ebé hakna’ar an iha rádiu ne’e ami nian, maibé ida ne’e komunidade hotu-hotu iha Balibo laran nian”, tenik nia.
Entretantu orsamentu ne’ebé SECOMS utiliza hodi apoia Rádiu Komunidade Fronteira Balibo 5, hamutuk dólar rihun rua nulu resin.
Jornalista: Sandi Belo
Editora: Quisânia Gleide
