(Bobonaro) Balibo-Komemorasaun loron trajedia Balibo Five ba tinan 50 no loron Nasionál Liberdade Imprensa ba da-tolu, Xefe Estadu Maior Jeneral FALINTIL-Forsa Defeza Timor-Leste (F-FDTL), husu ba jornalista sira, labele para hodi buka lia loos, kompromete iha jornalista sira nia defeza ba justisa no tenke kompromisu ba informasaun ne’ebé loos.
Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Falur Rate Laek, hatete, jornalista Timoroan sira, servisu jornalista nian mak halo misaun atu buka informasaun sira no habelar lia loos, atu promove justisa liu husi informasaun ne’ebé mak jornalista sira rekolla.
“Ha’u hakarak dirije lia-fuan espesiál ida kona-ba rekoñesimentu no responsabilidade, ita-bo’ot sira mak erdeiru sira ba legadu husi Balibo Five no Roger East, ita bo’ot sira nia misaun atu buka no habelar lia loos, atu promove justisa liu husi informasaun, ne’e fundamentál ba konsolidasaun ita nia demokrasia,” dehan Xefe Estadu Maior Jeneral FALINTIL-Forsa Defeza Timor-Leste (F-FDTL), Tenente Falur Rate Laek,” iha kalan reflesaun Nasionál kona-ba papel média iha tempu rezisténsia no faze dezenvolvimentu Nasionál, iha kampu Balibo Vila, Kuarta 15/10/2025
Tanba ne’e jornalista sira labele para hodi buka lia loos, jornalista sira tenke kompromete atu defeza ba justisa no kompromisu ba informasaun sira ne’ebé mak loos.
“Labele para hodi buka lia loos, kompromete iha ita bo’ot nia defeza ba justisa, no inkoruptivel iha ita bo’ot sira nia kompromisu ba informasaun ne’ebé loos, istória Timor-Leste nian sei hakerek hela, no ita bo’ot sira iha priviléjiu no responsabilidade atu rezista ba jerasaun sira iha futuru”, nia dehan.
Nune’e nia dehab, dezafiu sira ne’ebé jornalista sira hasoru ohin loron ne’e diferente ho jornalista nain lima ne’ebé mak hasoru iha Balibo ne’e, maibé la menus importante iha mundu ho dezinformasaun no manipulasaun média, jornalista sira nia kompromisu ba lia loos faktuál mak nesesáriu tebes.
Jornalista sira keta tauk ho podér, keta reduz ho solusaun fásil sira, keta rende ba tentasun sensasionalizmu sira, onra sakrifísiu husi sira ne’ebé mak fó sira nia moris ba lia loos hodi sai defensór sira ne’ebé kompromete ba lia loos.
“Tanba jornalista internasional sira nia ezemplu inspira ita hodi hari’i Timor-Leste ida ne’ebé lia loos menan lia bosok, justisa menan impunidade, no liberdade menan opresaun”, nia konklui.
Jornalista: Sandi Belo
Editora: Quisânia Gleide
