(Média Mudansa) Aeroporto PR Nicolau Lobato Dili – Eventu Holy Wings Sports Show (HSS) ne’ebe hala’o iha Bali-Indonésia, Boxista Daniel Asis Belo hateten vitória ne’ebe nia dedika ba espesial ba loron restaurasaun independénsia Timor-Leste ba dala 23.
Iha intervista Boxista Daniel Asis Belo nebe husi El-Matador Boxing Club hatete, joga kontra Boxista Indonesia Krispinus ho resultadu final ho Valor 116-112 tanba hatudu performánsia diak iha ring leten liu hosi halo defeza no tuku makaas durante jogu hasoru nia adversariu iha Atlas Super Club Bali.
“Vitória ne’ebe ha’u hetan dedika ba loron restaurasaun independénsia Repúblika Demokrátika Timor-Leste ba dala-23, loron ohin nian no ba povu Maubere “. Hateten Boxista Daniel Asis Belo ba jornalista sira iha Aeroportu Internasionál Nicolau Lobato Comoro, 20/05/2025
Daniel hatutan,Boxista nebe nia hasoru makas no forte nebe sai hanesan esperiensia ba nia hodi prepara no treinu ho disciplina diak liu tan iha futuru
“ha’u atu prepara an diak no hadia an diak no dixiplina diak iha mundu boxing nian no sai boksista ne’ebe diak iha futuru oin mai”. Nia afirma
Iha fatin hanesan Treinador El-Matador Boxing Club, Abilio Orlando dos Santos reforsa no fo obrigadu ba povu Timor-Leste ne’ebe fo orasaun no apoiu ona ekipa El-Matador hodi hetan tan vitória.
“El-Matador agradese ba parte hotu ne’ebe durante ne’e apoiu El-Matador, imi hotu nia apoiu no orasaun maka ohin loron ami nafatin iha no atividade sira kontinua la’o to’o agora ” Nia hatutan
Enkuantu Ligadu ho dezentendimentu ne’ebe akontese iha jogu HSS, treinador klarifika mosu desintendimentu tanba sira-nia parte la simu rezultadu nebe fo sai husi ekipa de juri, nune’e sira rasta Bandeira Timor-Leste maka ekipa El-Matador halo asaun hasoru sira iha ring leten.
“Dezentendimentu iha ne’eba, los duni katak bainhira ita nia boksista Daniel sai manan na’in ba eventu HSS, sira nia parte la simu ba iha realidade ida ne’e, sira koko atu rasta ita nia Bandeira ne’e mak ami mos halo asaun hasoru sira”nia esplika.
Nia reforsa Timoroan hotu sei la fo ulun ba ema ida atu rasta Bandeira Timor nian tanba ne’e dignidade nasaun nian, ita tenke luta ba ita nia Bandeira ida ne’e.
“Iha momentu ne’eba iha reasaun maibe hotu husi ne’eba ami konsege resolve no parte rua ne’e diak malu kedas iha ne’eba, Vitória ne’e, ita nia Boksista Deniel Asis Belo hetan medalha ida, ne’e vitoria Timor nian, dedika ba loron restaurasaun independénsia Repúblika Demokrátika Timor-Leste ba dala-23″Nia salienta
Entretantu Boxista Daniel de Asis Belo hanesan boxista potensial Timor -Leste neebe husi Boxing Club El-Matador nebe maka sai ona kampiaun ba dala tolu (3) iha eventu HSS Bali-indonesia.
Ekipa Kobertura Media mudansa
