Díli (Mudansa)-Fokupers no World Vision Timor-Leste Komemora loron 16 ativizmu hasoru feto liu husi dialogu ho tema “Hamutuk Ita Prevene no Hapara Violénsia Hasoru Feto Hodi Promove Igualidade Jéneru no Asegura Feto nia Direito Umanu Liu Husi Empoderamentu Ekonomia”
Objetivu husi dialogu ne’e mak hanesan atividade ida ne’ebé hola parte iha selebrasaun kampaña loron 16 ativizmu kontra violénsia hasoru feto no labarik feto inklui feto vulnerável sira iha Timor-Leste atu núne’e ema hotu-hotu konsiente katak Violénsia Domestika no Violénsia Bajeia ba Jeneru ne’e krime públiku la’os ona kazu uma laran nian.
“Atividade ida ohin ne’e hodi hola parte ba iha selebrasaun kampaña loron 16 ativizmu kontra violénsia hasoru feto no labarik feto, entaun ita hotu-hotu hatene katak ita nia tema nasionál ba iha loron 16 tinan 2024 nia mak ita mai ho tema ida mai ita hamutuk prevene no hapara violénsia hasoru feto no labarik feto iha Timor-Leste, entaun iha ambitu ida ne’e Fokupers servisu hamutuk ho organizasaun World Vision Timor-Leste no mós FEEO ne’ebé nia fundus mai husi Uniaun Europeia, ita konsegue realiza atividade ida hanaran Dialogu Públiku ida ne’ebé nia alvu mak ita bolu joven foin sa’e sira husi Munisípiu Díli atu nune’e sira hola parte mós iha eventu dialogu ida ne’e, nune’e sira hotu-hotu bele sai autór prinsípal ba iha luta hasoru violénsia feto no labarik feto liu husi empoderamentu ekonomia feto no mós promove direitu feto”, dehan diretora Fokupers Domingas Afonso Amaral, iha Salaun Delta Nova, Díli 09/12/2024.
Nia haktuir, matéria importante ba partisipante sira iha dialogu mak hanesan foku liu ba oinsá atu bele ko’alia kona-ba empoderamentu feto vulnerável sira no feto sobre vivente sira.
“Pontu matéria importante sira ne’ebé ita koloka iha ne’e mak ita foku liu ba oinsá ita bele ko’alia kona-ba empoderamentu ekonomia ba feto vulnerável sira no feto sobre vivente sira, tanba ita hotu-hotu hatene katak bainhira feto ida hetan empoderamentu ba iha nia ekonomia nia komesa kontribui ba dezenvolvimentu nasaun ida ne’e liu-liu komesa kontribui ba iha paz no dame iha ninia família uma laran sira, oan sira bele ba eskola no mós hetan rendimentu hodi dezenvolve nasaun ida ne’e no mós kria fini sira ne’ebé ho promove igualidade jeneru”, tenik nia
Iha fatin hanesan Diretór Nasionál World Vision Timor-Leste Jaret Berends hatete, dialogu ida ne’e hanesan atividade ida atu selebra kampaña loron 16 ativizmu kontra violénsia hasoru feto no servisu hamutuk ho parseiru sira hanesan Fokupers no FEEO hodi habelar liu tan informasaun sira atu prevene violénsia hasoru feto no labarik feto iha Timor-Leste.
“Liu husi dialogu ida ne’e iha ambitu selebrasaun loron 16 ativizmu kontra violénsia hasoru feto no labarik feto iha Timor-Leste World Vision Timor-Leste servisu ho parseiru hanesan Fokupers no FEEO hodi fahe informasaun kona-ba hapara violénsia hasoru feto no labarik feto iha Timor-Leste no hasa’e partisipasaun feto iha atividade ekonomia no negosiu”, dehan diretór ezekutivu World Vision Jaret Berends, iha salaun Delta Nova 09/12/2024.
Nia hatutan World Vision Timor-Leste hanesan organizasaun naun governamental ne’ebé eziste iha Timor-Leste inisiu iha tinan rihun ida atus sia sia nolu resin lima (1995) iha organizasaun ne’e rasik sira nia parte rekoñese katak kazu abuzus no violénsia bazeia ba jeneru ne’e seriu tebes.
“World Vision Timor-Leste mak organizasaun naun governamental ne’ebé eziste iha Timor-Leste bazeia ba fiar desde tinan 1995 iha World Vision Timor-Leste ami rekoñese katak violénsia hasoru feto mak hanesan norma kultura sosiál, atu kombate ida ne’e ami ho parseiru sira no membru komunidade sira hodi kombate desiguldade no deskriminasaun transforma jeneru ne’ebé mak tenke iha igualidade no inkluzaun”, informa nia
Iha sorin seluk Sekretária Igualidade Inkluzaun, Elvina Sousa Carvalho hateten, nia parte hakarak apresia ba inisiativa hosi organizasaun sira ne’ebé realiza ona atividade ida ne’e.
“Ohin loron ida importante tebes, hanesan Sekretária Igualidade nafatin apresia ba ita bo’ot sira tanba liu husi atividade sira seluk hodi priense loron 16 kampaña, hanesan ohin embaixador hateten katak sosiedade sívil liña ministérial sira halo atividade la’os iha Díli de’it maibé iha mós Munisípiu atu nafatin fó hanoin importasia husi hamenus violénsia no Kualker violénsia hasoru feto no labarik feto no mós empodera feto iha vida ekonomia no setór hotu”, halotu SEI 09/12/2024
Entretantu dialogu ne’e partisipa maioria husi joven universitariu sira iha Munisípiu Díli, Organizasaun naun governamental nasionál no internasionál, Polísia Nasionál Timor-Leste no Autoridade Lókal sira, enkuantu atividade ne’e Fokupers servisu hamutuk ho World Vision Timor-Leste no hetan suporta mós husi Uniaun Europeia.
Jornalista: Remigia Locateli
Editora: Sandi Belo
