(Díli) Mudansa-Arche Bispo Arquediocese Metropolitana de Díli, Dom Vírgilio do Carmo da Silva SDB, iha nia Omilía ba misa agradesementu tinan 33 komemora loron masakre Santa Cruz, katak, razaun fundamental ba ita ohin hodi halibur hamutuk iha fatin ida ne’e atu hanoin fila fali akontesimentu tinan 33 liu ba, hanoin fila fali buat hotu ne’ebé akontese iha Santa Cruz, hanoin fila fali hodi agradese ba Maromak no buat hotu ne’ebé Nai Maromak halo liu husi eventu bo’ot ida ne’e.
La iha dalan ne’ebé diak liu mai ita ema nu’udar fiar nain, ne’ebé hahú ita nia loron ohin hodi hanoin ida ne’e halibur hamutuk atu agradese ba Maromak ba buat hotu-hotu ne’ebé ita hetan liu husi eventu ida ne’ebé ita selebra nu’udar eventu istóriku.
“Saun Paulo nia segunda leitura uza termu seluk escreve karakteristika matenek nian hodi bolu ita atu hanoin fila fali kona-ba ita nia vokasaun sarani sira nian, katak ita ema hotu-hotu tanba baptismu ita hotu sai ema ida de’it maske ita hotu husi lisan ne’ebé la hanesan no husi distritu ne’ebé la hanesan, maibé tanba baptismu ita hotu hola parte iha vokasaun komum ida nu’udar ema sarani, tan baptism Saun Paulo dehan ita hare’e malu hanesan maun alin, tulun malu no la buka de’it an rasik, hatene pasénsia ba malu, hatene hatudu laran maus ba malu, hatene hatudu laran di’ak ba malu no buka nafatin atu sai laran ida de’it no neon ida de’it basá ita hotu mesak isin ida de’it iha Kristu”, dehan amu Bispo iha nia Omilía ba misa agradesementu masakre Santa Cruz, iha igreja Catedral, 12/11/2024.
Tanba ne’e amu Bispu hatete, antes Jesus fila ba nia aman, nia harohan ba grasa ida ne’ebé bo’ot liu mak unidade , no nia motivu sentral iha orasaun mak unidade, no unidade ne’e nia modelu mak hanesan aman ho oan, nune’e mós unidade ida ne’ebé hetan abut iha Maromak Santísima Trindade, ho espíritu ida ne’e mak ohin loron ita halibur hamutuk iha ne’e, la to’o de’it hanoin ba kotuk maibé hanoin mós ba oin, ba kotuk ita admira ita louva tane a’as espíritu sakrefisiu ita nia herois sira nian, ita tane a’as liu patriotizmu, ita tane a’as ona espíritu saran-an ba rai ida ne’e nia di’ak no Timor nia libertasaun.
“Ohin Timor ida ne’ebé hetan ona nia libertasaun no nia independensia, momentu ida presiza espíritu ida ne’ebé matenek, la’os de’it Lalehan nian no rai nian, maibé Lalehan nian atu hanorin Timor oan hotu-hotu hahú hosi foin sa’e sira, hatene hare’e ba ita nia herois sira nia espíritu Patriotizmu ida ne’e, la’os hare’e de’it ho matan maibé hare’e mós ho fuan, hare’e ho hanoin no reflete”, dehan amu Bispu
Arche Bispu ne’e mós husu ba foin sa’e sira atu hadomi nia rai hodi defende no tane a’as valor sira nasaun nian.
“Foin sa’e sira ohin loron presiza espíritu sakrefisiuida ne’e nian, foin sa’e ida ne’ebé hadomi nia rai hodi estuda makas, servisu makas, no foin sa’e ida ne’ebé hadomi nia rai mak ida ne’ebé defende no tane a’as valor sira rai nian, apresia malu, haraik-an ba malu, respeita malu, tulun malu no servisu hamutuk, hatene sakrefika nia an ba nia komunidade no nia nasaun, iha leitura Saun Paulo nia dehan, atu hetan unidade katuas sira buka atu hakiak hahalok di’ak sira hodi hanorin foin sa’e sira, ferik sira buka mós hatudu hahalok sira inan nian hodi hanorin ba iha foin sa’e sira, no foin sa’e sira hare’e ba iha ezemplu ida ne’e”, dehan Amu Bispu
Nune’e , unidade la’os buat ida ne’ebé autómatiku ema buti de’it nia ba kedas, unidade ne’e ezize sakrefisiu hotu-hotu, hahú kedas hosi família ba to’o iha eskola no komunidade, la’os ezize de’it ba foin sa’e sira maibé iha família dala barak la iha unidade karik, iha komunidade ka sosiedade ita nia lia-fuan, hahalok sira no linguajen sira mós dala ruma ameasa ba unidade karik, tuir Saun Paulo nia lia-fuan katak família mak sai baze atu hakiak unidade ida ne’e.
“Wainhira hanoin kona-ba herois sira nia domin ba Timor nia di’ak, hare’e ba oin ita mós bele husu ba ita nia an saida mak ha’u bele fó atu kontribui ba nasaun nia dezenvolvimentu, oinsá mak ha’u hatudu ha’u nia domin ba rai doben ne’e iha momentu ka tempu ida ne’e”, tenik Amu Bispu
Jornalista: Zemidonio Martins
Editóra: Sandi Belo
