(Díli) Mudansa-Komemora loron Masakre Santa Cruz ba dala 33, Tenente Jeneral Forsa Falintil Defeza Timor-Leste (F-FDTL), Falur Rate Laek halao vizita ba iha fatin Abrigu Kay Rala Xanana Gusmão nia subar fatin iha Cacaulido, Díli.
Tenente Jeneral Falur Rate Laek, halao vizita ba fatin Abrigu Kay Rala Xanana Gusmão nian durante tinan ida iha Cacaulidu, tersa 12/11/2024, bainhira halao vizita ne’e iha diskursu Tenente Jeneral nian hatete, istória luta ne’e justisa, laos de’it funu atu manan maibé tanba hakarak defende Justisa, ema bele mate maibé istória sei la mate.
“Istória luta ne’e justisa nian, ita funu la’os de’it atu manan husi indoneziu sira, maibé oinsá ita atu defende justisa, ema bele mate maibé istória no justisa sei la mate, importante mak dignidade no ondra ne’ebé nasaun kombatente halo”, dehan Tenente Jeneral Falur Rate Laek, iha nia diskursu iha Cacaulidu, Díli Tersa, 12/11/2024
Iha fatin hanesan, faluk Rosarda da Conceição espoza husi saudozu José Acaçio Tilman hatete, nia sente kontente wainhira Tenente Jeneral Falur Rate Laek halao vizita ba fatin abrigu Kay Rala Xanana Gusmão nian iha Cacaulidu, Díli.
“Hau kontente ohin ita nia bo’ot sira bele hi’it an mai iha fatin abrigu ida ne’e, hodi hare’e rasik fatin ne’ebé mak ita nia maun bo’ot Xanana subar iha rai kuak ida iha ha’u nia uma laran, tanba ne’e ha’u nia hakarak fatin ida ne’e atu sai hanesan fatin istóriku ida”, dehan Rosarda da Conceição ba jornalista Media Mudansa iha Cacaulidu.
Nia husu ba joven sira atu sai hanesan joven sira uluk tenki tulun malu no hadomi malu, la bele buka mak problema hodi tuku malu.
“Ha’u husu ba joven sira ne’e ha’u hakarak imi sai hanesan ami iha tempu uluk, tulun malu no hadomi malu, labele buka mak problema, buka mak buat ne’ebé ba ita nia nesesidade moris no tenki sai joven ne’ebé mak hadomi ita nia rai”, tenik nia
Entretantu komemorasaun loron masakre Santa Cruz 12 novembro ba dala 33, Maior Tenente Jeneral F-FDTL Falur Rate Laek hamutuk ho Ministra Edukasaun, Ministra Saúde inklui mós membru Masakre Santa Cruz sira halao vizita ba iha fatin Abrigu Kay Rala Xanana Gusmão nian iha Cacaulidu hodi konta istória kona-ba akontesementu 12 novembro iha tinan 1991.
Jornalista: Inacio Silva
Editora: Sandi Belo
