(Ainaru) Mudansa–Prezidente Repúblika, José Ramos Horta husu atu estadu bele rekoñese Festivál Rabilau sai Festivál Kulturál iha Timor-Leste ne’ebé ho nia kontiudu atividade divertimentu sein pursentu (100%) tradisaun Timor nian, hodi nune’e bele atrai turista lokál no internasionál.
“Rabilau bele sai Festivál bo’ot iha Timor-Leste kada tinan ema atus no rihun ba rihun bele mai. Desde mai, buat ne’ebé ha’u hatete labele dada grupu modernu sira maka mai toka fali, 100% tenke toka ho grupu tradisionál hanesan dansa koremetan no dansa tradisionál sira seluk ne’ebé iha”, dehan Prezidente Repúblika ba jornalista sira iha Pontu Administrativu Maubessi, Munisípiu Ainaro, kuarta ne’e, (16/10/2024)
Xefe Estadu haktuir tenke rekoñese ida-ne’e, inisiativa ne’e hahú ona tinan kotuk xefe suku Maubisse sira maka hahú ho sira nia rekursu rasik.
“Tinan kotuk ha’u mai , iha momentu ne’ebá ha’u mai sosa karau ida ba sira. Momentu ne’ebá infreasturtura balun iha no balun menus loos nune’e ha’u fó apoiu balun tán no ko’alia ho Primeiru Ministru no Vise-Primeiru ministru, nune’e envolve governu hodi hadi’a di’ak liu iha futuru”, Xefe Estadu dehan.
Tanba ne’e presija Governu nia envolvimentu no Ministériu responsável sira liu-liu Ministériu Arte no Kultura hodi promove kultura TL, labele lori fali kultura modernu.
“Reprezenta tradisionál duni, la’ós lori fali grupu modernu sira, se hanesan ne’e, di’ak liu halo de’it iha Dili tanba Maubisse ne’e sai hanesan illa kulturál ba Munisípiu hotu hodi halo buat ne’ebé orijinál no 100% no 100% tradisionál kulturál. Rabilau maka sai festivál kulturál timor nian iha futuru,” hakotu PR
Jornalista : Gaudencia Belo
Editór : Veraka