(Dili) Mudansa – Estudante Universidade Instituto Superior Cristal (ISC) Atanacio Soares, preokupa tebes ho lixu ne’ebé sidadaun sira tau butuk iha fatin furak jardin Palacio Governo oin, no la aseita bainhira soe foer iha fatin públiku ne’ebé atrai ema hotu nia matan.
“Tuir ha’u nia hanoin fatin sira hanesan ne’e labele atu tau foer bá laran, tanbá buat ida hanesan ne’e iha nia modelu no atu halo fatin ne’e sai furak liu tan iha jardin Palacio Governu oin atrai ema hotu nia matan, la’os atu tau foer bá laran,” Dehan Estudante (ISC) Atanacio Soares bá Jornalista Media Mudansa iha Palacio Governu, kinta-Feira (03/06/24)
Nia relata, tuir lolos ne’e labele atu soe foer bá fatin sira hanesan ne’e, tanbá fatin sira hanesan ne’e la serve atu soe foer bá laran, tanbá fatin ne’e halo furak nasaun ida ne’e.
“Ita ema iha konsiensia soe foer iha nia fatin, labele soe fali iha fatin ne’ebé mak halo furak tiha ona, tanbá fatin ida ne’e iha fatin públiku sá tan iha Palacio Governu nia oin, no iha tasi ibun, se ita halo hanesan ne’e, no ita nia konsiénsia ne’e bá ne’ebé, ” Atanacio Soares afirma
Estudante ne’e esplika, iha Palacio oin ne’e, tuir lolós labele atu soe foer arbiru, ema barak bá mai hodi senti fatin ne’e nia furak, la’os foer mak nakonu iha fatin ne’e haree la furak
Nune’e mós Atanacio, rekomenda bá parte Governu tenki halo regulamentu ida ne’ebé makaas bá Sidadaun sira ne’ebé soe foer arbiru hodi nune’e sira mós bele prevene soe foer ka lixu arbiru iha fatin públiku sira.
“Bá Sidadaun Timoroan hotu tenki iha fuan no hadomi Ita nia Nasaun no ita mós tenki tau ona ita nia a’an hanesan Timoroan ida, no tau ona ita nia a’an hanesan Timor, ita tenki prevene hahalok sira ne’ebé la fó vantajen bá Nasaun Timor-Leste,” hakotu Atanacio hakotu.
Jornalista : Zemidonio Castro Ximenes
Editóra : Delfina Borges
