(Lautém) Mudansa–Defisiénte matan Sabino Bernadino mai husi Munisipiu Lautem Postu Administrativu Lore Suku Lore1 Aldeia Horolata aman mak sai ai-mahon ba nia familia no oan sira, maibe derepenti nakukun hafalun nia matan rua labele haree senti triste lakon responsabilidade hanesan aman iha familia.
“Hau nia matan rua ne’e uluk di’ak hau halo to’os no foti nuu habai halo maran atu hetan osan hodi sustenta nesesidade familia uma laran, iha tinan 2020 nakukun hafalun tebes mai hau nia matan, hanesan aman sai ai- mahon di’ak ba familia li-liu ha’u nia oan sira hakarak halo servisu hetan osan hodi ajuda oan sira nia futuru,maibe derepenti deit nakukun hafalun ha’u matan rua ne’e a’at no la hare rai ha’u sente triste tanis hamonu matawen,tanba lakon responsabilidade hanesan aman iha familia no lakon buat hotu ho matan rua ne’ebe hafalun ho nakukun,”Dehan Difesente matan Sabino Bernadino ba Jornalista sira iha nia kna’ar fatin Suku Lore aldeia horolata kinta (30/05/24),
Defisiente matan Bernadino Foto: Gaudencia Belo
Defisiénte Bernadino salienta, matan rua derepente mean hotu matan teen sai barak , nia ba halo tratamentu iha Hospital Nasional Guido Valadares (HNGV), maibe doutor sira dehan matan rua urat mate hotu ona rona ida ne’e sente triste, maibe nia lahatene ne’e inpaktu husi moras saida ho nune’e nia deside fila mai nia uma tuur ho matawen hanoin oan sira nia futuru atu sai oinsa loos.
“Hau sente lakon tebes ba buat hotu furak mundu nian,tanba hau nia matan rua ne’e be mak uza hodi haree no halo servisu hetan osan,realidade hau nia matan rua a’at hotu ha’u tuur ho matan ben de’it ha’u laiha forsa atu haree rai halo servisu hodi hetan osan atu ajuda ha’u nia oan nain 8 nia eskola, maibe ohin ha’u laiha kbiit no forsa ona ha’u tenke abandona hau nia oan nain 8 nia futuru.”Nia sublina.
Defisiénte akresenta tan,bainhira nia matan a’at (defisiente matan) nia fen oan mak ajuda nia atu ba haris fatin hodi soe bee ki’ik no be bo’ot wainhira nia fen ba tiha to’os, entaun nia kaer nia ai-tonka hodi baku besi ne’ebe nia oan sira tau iha uma ne’e to’o iha haris fatin no ema la ajuda nia atu ba haris fatin.
“Wainhira hau nia fen ba to’os nia tenke tein etu rai iha meza molok nia ba to’os atu nunee ha’u hamlaha karik ha’u bele han mesak, wainhira ha’u nia ferik oan moras ruma ha’u hanoin de’it, maibe ha’u atu ajuda oinsa tanba ha’u nia matan mos a’at no ha’u nia oan sira mos agora iha hotu Dili tan deit ami nia moris hanesan ki’ak no laiha buat hotu,” Nia Hateten
Bernadino sente triste tebes tanba ho kondisaun ne’ebe hanesan ne’e,parte Autoridade lokal no governu to’o agora seidauk fo apoiu ruma ba nia atu uza ba nia nesesidade, no mos seidauk hetan subsidiu difisiente ruma husi parte relevante sira.
Iha sorin seluk Espoza defisiénte matan, Linda Ximenes mos hatutan katak, atividade Loron-loron nian hanesan to’os nain, tanba laiha osan ho nune’e nia tenke ba to’os foti nu’u maran mai habai hodi fa’an atu hetan osan hodi hola hahan no haree nia oan sira nia eskola.
“Wainhira hau nia laen nia matan a’at (defisente matan) ha’u deside sai xefi familia uma laran hodi halo to’os no buka nuu maran hodi fa’an ba ema atu hetan osan hodi sustenta ami nia nesesidade uma laran no ba ha’u nia oan sira nia futuru, bainhira fa’an nuu maran hetan osan fahe ba oan sira karik la too balun la fo, dalaruma mos buka produto ne’ebe iha to’os laran hodi fa’an fali, kuando la to nafatin pasiensia tanba moris mak hanesan ne’e ona,” Nia esplika
Linda Ximenes halo to’os mesak, tanba nia laen nia kondisaun ne’ebe moras ho difisiesia matan la haree, servisu ida ne’ebe todan ba nia mak halo lutu ba to’os,bainhira lutu ne’ebe halo nia forsa la to’o labele assesu ba produto ne’ebe iha to’os laran.
“Ida ne’e mak ha’u nu’udar inan ha’u senti triste ba hau nia moris maibe hau prontu simu ho liman rua tanba ida ne’e mak realidade moris ne’ebe ami hasoru, kuandu iha mudansa klimatika ne’ebe akontese bainhira tempu klima udan monu rai ho tuir nia tempu ami bele sente katak hahan produtu lokal ne’ebe ami kuda fo nia rezultadu ne’ebe diak, wainhira udan monu rai la tuir nia tempu hanesan tinan ida ne’e ami la hetan produtu lokal ne’ebe ami kuda, tanba impaktu husi mudansa Klimatika halo bailoron naruk ami nia produtu lokal ne’ebe ami kuda sempre mate hotu,” Nia Hotu
Entertantu “Aktividade Media Tour ida ne’e realiza tanba Asosiasaun jornalista Timor-Leste (AJTL) kolabora no OXFAM iha Timor-Leste no hetan Fundus iha Hongkong”
