(Dili) Mudansa– World Food Program (WFP) ho Sekretatriu Estadu Protesaun Sivíl (APC) selebra akordu hodi fó apoiu integradu ba komunidade vulneravél sira ne’ebé afetadu hosi fenomena mudansa klimátika EL-nino ne’ebé rezulta komunidade lakon oportunidade halo toos no lakon oportunidade ba estabilidade ekonomiku.
Sekretatiu Estadu APC Domingos Mariano Reis hatete, akordu ne’ebé foin asina entre APC, WFP ho prisipiu atu fó apoiu integradu ne’ebé kompostu hosi APC, WFP no Ministeriu Solidariedade Sosiál no Inkluzaun (MSSI), apoiu ne’e ho tipu ai-han, foos toneladas 455 ho pakote rihun sanúlu resin-neen (16,000) hodi tarjeta ba komunidade vulneravél sira ne’ebé sei afeta hosi mundasa klimátika El-nono.
“Apoiu ne’e hanesan preparasaun konservasaun ai-han ba komunidade vulneravél sira atu bele hatan ba fenomena naturál EL-nino ne’ebé sei mai iha fulan rua ka tolu ne’e. Apoiu ne’e sei kobre múnisipiu ne’en (6) hanesan Munisipiu Covalima, Ermera, Manufahi, Likisa, Laútem ho Bobonaro. Ai-han ne’e sei apoia mak hanesan fós, mina no koto,” dehan Sekretatiu Estadu APC Domingos Mariano Reis iha Salaun APC Kaikoli, kinta, (13/06/2024)
Iha fatin hanesan Reprezentante Country Director WPF, Alba Cecilia Garzon Olivares, hateten, Programa Ai-han Mundiál (Segla Inglês WFP) nia ezistensia iha Timor-Leste desde tinan 1999 hala’o atividade oi-oin hodi apoia governu Timor-Leste liu-liu iha programa nasionál sira ne’ebé iha influensia makaas hodi muda moris komunidade nian iha setór oi-oin.
“Atividade espesífiku hosi akordu ne’e mak atu fó apoiu komunidade ne’ebé afeta hosi impaktu El-nino hanesan tuir esperensia uluk ne’ebé iha enrelasaun ho bai-loron naruk ne’ebé afeta komunidade lakon oportunidade hodi halo toos no lakon oportunidade ba estabilidade ekonomia,” dehan nia
Apoiu ne’e sei projeta ba komunidade ne’e hetan afetadu makaas liu-liu iha munisípiu neen, kompostu hosi Munisipiu Covalima, Ermera, Manufahi, Likisa, Laútem ho Bobonaro. Apoiu ne’e konsidera hanesan apoiu integradu entre WFP, APC no MSSI hodi haree no identifika komunidade vulveravél sira ne’ebé hetan afetadu. WFP hanesan atu fó apoiu ba programa nasionál sira ne’ebé foka liu ba komunidade vulneravél sira no APC no MSSI hanesan save parseiru hodi fó susesu ba atividade ne’e.
Jornalista: Ana Ribeiro
Editóra: Delfina Borges
