DÍLI(MUDANSA)-INSIDA,IP hanesan Instituisaun ida ne’ebé iha papél importante atu kombate Virus HIV-SIDA ne’ebé nia numeru kontinua aumenta iha Timor-Leste, ho nune’e intituisaun refere nafatin habelar infórmasaun ba fatin hotu-hotu, liu-liu iha suku, aldeia, eskola sira, no mós instituisaun religiosu sira no iha hanoin atu estabelese ekipa konjunta halo inspeksaun ba fatin kost tanba kost sai hanesan fatór prisipal ba aumenta numeru HIV-SIDA.
‘’Objetivu hosi sensibilizasaun ida ne’e mak óinsa atu habelar infórmasaun ba família sira atu proteze ita nia an di’ak liu duke fó isin ba virus ida ne’e, dezafius bo’ot ida ba ita iha Timor liu-liu iha Díli mak ida ne’e mesmu ita hatene katak virus ne’e ameasadu, ai-moruk la iha maibé atividades ransu livre entre feto no mane kontinua la’o, ne’e dezafius ida, atu ba hapara ne’e, sira dehan sira nia direitu, direitu ida kontinua estraga sira nia futuru, direitu ida ne’ebé sira rasik estraga sira nia” Dehan Diretor INSIDA,IP Daniel Marçal ba jornalista Media Mudansa iha Quinta-feira 11/04/2024 Suku Kakeu laran
Nia haktuir tan katak, ba oin sei kopera hamutuk ho autoridade munisípiu Díli hodi tau importansia ba fatin hotu-hotu iha Díli laran, tanba Díli sai hanesan fatin sentru ba ema hotu-hotu ne’ebé mak mai hala’o servisu, estudu no atividade seluk, ho nune’e fatin livre kontinua aumenta no virus mós kontinua aumenta ba bei-beik iha kapitál Díli.
‘’ Hau hanoin hela, ita atu halo kordenasaun ekipa ida para ita bele halo tok inspesaun ruma ou atividades ruma para ita bele hamenus atividade livre ne’e tanba atividade livre ne’e kontribui makaas teb-tebes ba tranmisaun HIV no mós moras daet sira seluk, fatór potensial sira mak hanesan fatin kost sira, ita nia joven sira mai hosi fóho mai hela iha Díli la’ós de’it joven, ema kaben nain mai iha Díli soe hela Ama iha fóho ne’eba mai iha Díli la ba hela iha família ,hela de’it iha kost sementara, ita nia kost iha Timor ne’e la iha regulamentu kona ba feto ho mane moris hamutuk tanba ida ne’e hanesan desafius bo’ot ida ba ita nia rai, ba oin ita presija tau atensaun’’ dehan nia
Iha sorin seluk Autoridade Munisípiu Díli relata, PAM sei halo ekipa konjunta hamutuk ho seguransa no autoridade komunitaria sira hodi halo operasaun ba fatin hotu-hotu iha Díli laran, liu-liu pessoal se de’it mak atu loke kost tenke iha karta lisensa ba Autoridade.
“Infórmasaun ka fónte ida hosi moras ne’e ida mak relasionamentu ema nia no sira ne’ebé hela iha kost sira, saida mak ita atu trata, primeiru tenke iha koperasaun, tenki iha ekipa konjunta entre instititutu kompate nasional ba HIV-SIDA nia, ho munisípiu Díli inkuzivamente hamutuk ho autoridade hanesan, sefe suku, sefe aldeia sira, no mós polísia atu nune’e kotrola lesuk,,atu nune’e ema atu loke kost tenke iha lisensa no autoridade sira tenke tau matan ema se mak mai iha ne’eba sira mai iha ne’e halo saida’’ Dehan Prezidentee Autoridade Munisípiu Gregório da Cunha Saldanha.
Nia afirma tan katak, PAM iha ona planu tempu badak sei hasai regra ou karta sirkular ida ba pessoal hotu-hotu, ne’ebé hakarak atu loke kost iha Kapitál Díli tenke hetan autorizasaun hosi Autoridade Munisípiu Díli tanba atu evita moras refere governu tenke iha responsabilidade maximu no tenke kontrola makaas ba nia povo sira.
Iha fatin hanesan, representante partisipantes Marcolino hateten, nia parte sente kontente no orgullu tebes hakarak agradese ba instituisaun ne’ebé sensibiliza ona infórmasaun iha sira nia aldeia tanba infórmasaun refere óinsa mak atu azuda sira hodi bele prevene an hosi virus refere. ‘’Infórmasaun ida ohin, infórmasaun importante tebes tan HIV-SIDA, tanba ida ne’e apela hosi ema ida ba ema sanolu atu bele komprende liu tan saida mak HIV-SIDA hanesan ohin ita nia prezidente sira ko’alia, ita nia ai-moruk la iha, entaun presija evita kada família para atu nune’e labele hamósu da’et numeru ne’e a’as ba bei-beik, hanesan joven mós atu apela tanba ohin livre ne’e iha uma kost sira entaun rona hela infórmasaun ida ne’e tenke komprende di’ak saida mak HIV-SIDA ‘’ dehan nia
Entretantu dadus kazu HIV Timor-Leste hamutuk 1996, labarik hosi tinan 5 hamutuk 57 ho pursentu 3%, labarik ho idade tinan 6-14 hamutuk 18 ho pursentu 1%, joven ho idade 15-24 hamutuk 572 ho pursentu 27% , 25-44 hamutuk 1205 ho pursentu 57%.
Kasu munisípiu Díli 1541, Bobonaro 113, Covalima 95, Oe-Cusse 65, Baucau 53, Ermera 37, Ainaro 36, Likisa 23, Manatutu 20, Manufahi 18, Aileu 17, Lautem 16, Viqueque 16.
Jornalista: remigia Locateli
Editór : Veraka
