(Díli) Mudansa- Ministériu Ensinu Superiór Siensia no Kultura (MESSK) asina nota entendimentu ho Universidade Nasional Timor Lorosa’e (UNTL) kona-ba projetu sistema baze dadus, projetu ne’e sei asina ho Ensinu Superiór sanulu resin-sia (19) iha Timor-Leste.
Governante ne’e esplika, objetivu husi asina nota intendimentu ne’e mak atu estabelese baze dadus ba Ensinu Superiór sanulu resin sia (19) iha Timor-Leste, oinsá mak mundu bele assesu ba dadus kada Universidade sira no mós fasil ba estudante finalista sira bainhira atu submete dokumentus ba graduasaun nian.
“Ohin Ministériu Ensinu Superiór Siensia no Kultura (MSSK) asina nota entendimentu ho Universidade Nasionál Timor Lorosa’e (UNTL) atu halo estabelesimentu ba baze dadus, ita bo’ot sira hatene ita iha Ensinu Superiór sanulu resin-sia (19) iha Timor-Leste, Ministériu hahú ona iha tinan 2023 liu ba ho Instituisaun ne’en (6), ohin ita asina fali tan ho UNTL atu halo baze dadus ba Ensinu Superiór sanulu resin tolu (13) atu nune’e iha tinan 2025 mai ita iha baze dadus ida, pelu menus ema ko’alia kona-ba Ensinu Superiór iha Timor-Leste, ema hatene ona katak baze dadus iha, se ema ko’alia kona-ba UNTL totál estudante hira mak gradua ona, no inklui área professores sira atu nune’e ema bele loke Website karik bele asessu,’’ Dehan Ministru Ensinu Superiór Siensia no Kultura José Honório da Costa Pereira Jerónimo, iha salaun reuniaun MSSK, Segunda-feira, 04/03/2024
Nia hatutan, Universidade sanulu resin sia ne’ebé eziste iha Timor-Leste, ne’en (6) Mak hahú estabelese tiha ona baze dadus no sanulu resin tolu (13) sei iha prossesu nia laran, tuir planu MESSK tinan ida ne’e bele estabelese ona, atu nune’e bele prevene mós profesores lisensiadu sira ne’ebé hanorin fali estudante lisensiadu inklui mós estudante ne’ebé aplika plajiadu.
“Ha’u atu hateten de’it Universidade ne’en (6) mak ita hahú tiha ona, ida rasik mak UNTL, São João de Brito, Díli Institute of Tecnology (DIT), Institute of Busieness (IOB), Institutu Superiór Cristal no CANOSSA, ita hahú hela sanulu resin tolu (13) inklui Universidade da Paz (UNPAZ), Universidade Oriental Timor-Lorosa’e (UNITAL), sira ne’ebé seidauk iha tinan ida ne’e ita hakarak Instituisaun sanulu resin tolu (13) ne’e bele iha ona baze dadus, ohin assina nota entendimentu ne’e atu fó hela kna’ar ba Fakuldade Enjeñaria UNTL liu-liu Pro-Reitór ida halo konta ba IT nian atu bele rezolve baze dadus ne’e ho Ministériu no servisu hamutuk ho Diresaun Teknólojia atu bele kompleta baze dadus ne’e iha tinan 2024, ba oin Ministériu sei kontrola ida ne’e ho baze dadus estudante ne’ebé Mak halo plajiadu atu nune’e ema nia monografia labele plajiadu foti iha UNTL ba hakerek iha UNPAZ foti iha UNPAZ ba hakerek iha UNDIL tanba ne’e mak baze dadus bele kontrola ida ne’e,” Nia salienta
Iha fatin hanesan Reitór UNTL João Soares Martins mós hateten, sistema dizitalizasaun implementasaun dadus ne’e atu implementa uluk iha Fakuldade tolu no sei aplika tan ba Fakuldade seluk tuir planu ne’ebé iha, no nia garante katak programa refere sei lao ho efetivu liu tan.
“Ami hahú uluk iha fakuldade tolu hanesan Fakuldade Agrikultura, Fakuldade Filozófia, no Fakuldade Direitu, antes ne’e Fakuldade Enjeñaria mak implementa nanis kedas ona no sira mak kria sistema ne’e, ami hakarak alarga no espanda utilizasaun ne’e ba Fakuldade hotu iha UNTL, tinan oin ami sei alarga tan ba Fakuldade Edukasaun, Fakuldade Medisina no mós Fakuldade Siensia Ezatas, fazeadamente sei bele kompleta Fakuldade sanulu (10) ne’e hotu kedas, espera bele aselera liu tan prosesu, maibé labele haluha katak ema sira monta sistema iha UNTL ami iha vantajen liu ba atu bele alarga sasan ne’e,”Tenik Reitór UNTL João Soares Martins.
Tuir observasaun jornalista Média Mudansa nian, partisipante iha serimonia asina nota entendimentu ne’e husi MESSK, Diretór Jeral MESSK, Diretór Jeral Planeamentu no Finansa MESSK, Inspetór Jeral MESSK, Reitór UNTL, Pro-Reitór UNTL, Dekanu UNTL, Koordenadór Ensinu MESSK inklui Diretór no xefe Departamentu sira husi MESSK.
Jornalista : Remigia Locateli
Editora : Sandi Belo
