(Dili) Mudansa – Sentru Nasionál Chega (CNC), asina nota entendimentu hodi fórmaliza kooperasaun ho Fundu Dezenvolvimentu Kapitál Umanu (Sigla portugés (FDCH) ba atribuisaun bolsa estudu ba sobrevivente oan sira.
“Ohin CNC fórmaliza fali kooperasaun institusionál (FDCH) hodi fórtalese servisu instituisaun rua nian iha futuru relativu ho kapasitasaun ba rekursu umanu espesialmente atribuisaun bolsu estudu ba sobrevivente oan sira, entaun ho akordu ida ne’e ba tinan ne’e husi Sentru nasionál chega ita prepara lista sobrevivente nia oan 15 pesoas maka sei sai benefisiariu uluk ba bolsu estudu ba (FDCH) nian,” Dehan Diretor CNC, Hugo Maria Fernandes, ba jornalista sira iha Balide Kuarta 06/03/2024.
Nia akresenta, Husi benefisiariu 15 pessoas ne’e ekipa tekniku husi CNC ho (FDCH) sei halo verifikasaun ba sira nia dokumentu hotu hodi haree, sira ne’e merese duni atu hetan bolsu estudu ne’e ka lae.
Sentru nasionál chega mós la taka matan ba Timor-oan sira ne’ebé maka hakarak aumenta sira nia koñesimentu iha area hanesan historia, sosiolojia, antropolojia, arkivu no mozolojia, iha akordu kooperasaun ida ne’e CNC sei fó oportunidade no fó biban ba Timor-oan sira atu bele aumenta sira nia koñesimentu iha area tematika sira ne’e tanba ne’e mós fóku ida ba Sentru Nasionál Chega.
Nia husu ba sobrevivente nia oan sira ne’ebé aban bain rua sai benefisiariu ba bolsu Fundu Dezenvovimentu Kapitál Umanu (FDCH) tenki hatudu seriedade estuda atu bele sai ema ne’ebé matenek atu nune’e aban bain rua hodi servi fali ita rai Timor-Leste ida ne’e.
Sentru Nasionál Chega mós atribui ona bolsu estudu ba sobrevivente nia oan sira hamutuk 11 no orsamentu ne’ebé husi CNC nian. Benefisiariu hirak ne’e hala’o ona estudu iha universidade Timor lorosa’e (UNTL), inklui ensinu superior iha Dili laran estuda iha area oin-oin no balu remata ona estudu iha universidade no balu sei iha semester 5 no semester 7.
“Sira ne’e ami la husik no ami kontinua halo kontrola ba sira no atividade ruma iha Sentru Nasionál chega ne’e mós ami nafatin envolve sira,” informa nia.
Iha fatin hanesan, Diretor (FDCH) Julio Apariçio hateten ohin (FDCH) asina nota entendimentu hodi fórmaliza kooperasaun ho CNC ba atribuisaun bolsu estudu ba sobrevivente nia oan sira ba tinan 4.
“Fundu Dezenvolvimentu Kapitál Umanu (FDCH) hanesan instituisaun estadu iha obrigasaun halo akordu ho instituisaun estadu nian ne’ebé de’it atu fó bolsu estudu ba Timor-oan priense rekezitu husi (FDCH) no liu husi akordu ne’e ekipa instituisaun sei halo verifika molok atribui bolsu estudu ba sobrevivente nia oan sira ba tinan 4,” Dehan nia.
Nia husu ba Timor oan sira ne’ebé mak hetan oportunidade ba bolsu estudu, husi governu hodi ba eskola iha rai liur no rai laran tenki aproveita ho didiak hodi tuir duni espetativa instituisaun nia hakarak.
“Kuandu imi la aproveita didiak, ami sei hakotu bolsu estudu ne’ebé mak ami fó ba imi, no ami sei haruka selu fali osan ne’ebé mak durante ne’e (FDCH) fó liu husi bolsu estudu, tanba iha kontratu ba atribuisaun bolsu estudu ne’ebé ami selebra husi instituisaun ne’e,” nia hakotu.
Jornalista : Esperança Monteiro Soares
Editór : Delfina Borges
