(Manatutu) Media Mudansa – Administradór Munisípiu Manatutu Bernaldo Lopes hateten, irigasaun iha Manatutu hetan estragus hosi udan bo’ot halo populasaun manatutu durante tinan 4 ona la halai natar.
Administradór Bernando dehan, kauza hosi udan bo’ot akontese estraga irigasaun a’at hotu kedan to’o ohin loron seida’uk hetan rehabilitasaun, bainhira ema liu ba mai haree, rai mamuk hela ema la halo natar, tanba irigasaun a’at iha parte Laclo, Sumasi, Rembor, Obrator ne’e a’at hotu kedan.
“Irigasaun iha Manatutu hetan estragus hosi udan bo’ot halo populasaun Manatutu durante tinan 4 ona la halai natar presija halo rekonstrusaun foun ho Orsamentu ida ne’ebé bo’ot, tanba ne’e to’o agora seida’uk book, hein Governu foti medida hodi garante natar nain sira halai fali natar.”Dehan Administradór Munisípiu Manatutu Bernaldo Lopes ba Jornalista media Mudansa hafoin partisipa iha serimonia kuda ai-kameli iha Batak Sulu Mahabat Postu Manatutu Vila Munisípiu Manatutu, (12-01-24).
Administradór Ne’e hateten, hosi Ministeriu Agrikultura Peska tun direita observa ona fatin hotu ona hodi tau eskavatórr hodi hadia no hatama bee iha irigasaun.
foto: Delfina Borges
“Ekipamentus ne’ebé apoiu hosi MAP hanesan eskavatór 2 no fini, maibé la sufisente hodi responde ba irigasaun ne’ebé mak a’at durante tinan 4 nian laran ne’e.”tenik Administradór bernado.
Munisípiu Manatutu iha Postu Administrativu 6, Suku 31, Aldeia 116, ho nia populasaun hamutuk 59 mil itál, hosi Postu 6 ne’e iha Postu Administrativuu 4 mak iha natar hanesan Postu Manatutu Vila, Laleia, Natarbora no beriki 3 iha natar no Postu 3 laiha natar.
Atu hatan ba ezijensia Ministeriu Agrikultura Peskas (MAP)T-L ne’e presija produtu lokál maka tenki hadia lalais irigasaun ne’ebé a’at tanba sai ona preokupasaun bo’ot ba populasaun Manatutu, no espera katak, bele halai fali natar no kuda fali hare maibé karik ko’alia de’it la kuda maka realidade sei la la’o.
Hatan ba preokupasaun ne’e Ministru Agrikultura Pekuariu Peska Floresta (MAPPF) Marcos da Cruz hatete, Uluk Japanes konstrui irigasaun bo’ot ida iha ne’ebà iha tinan 2002 mota bo’ot mai estraga tiha.
“Tinan ne’e ita aloka Orsamentu ba estudu ba irigasaun inklui mota Sumasi no mota Laclo ita iha ona dezeñu tau orsamentu hodi halo konstrusaun irigasaun ne’e hodi fornese bee ba iha natar ne’ebé mak durante ne’e abandona hela iha Manatutu.”Tenik MAPPF Marcos da Cruz.
Governante ne’e afirma, osan ba halo estudu nian ho montante rihun ha’at sei uza halo estudu ba iha kanál irigasaun 5 ne’ebé abandona.
“Agora lori eskavatór mai normaliza mota ne’e, maibé mota Laclo ne’e bo’ot kada tinan iha mudansa mota luan, kuandu ita kontinua investe iha ne’ebà, mota rua hanesan mota Sumasi no mota Laclo nian atu bele kontrui irigasaun iha ne’ebà, maibé seida’uk iha estudu tekniku ba ida ne’e tempu agora hosi mota Sumasi normaliza tau eskavatór hodi ke’e ona bee tama da-daun mai hosi mota Laclo ne’e rasik bee mai tama iha kanál insistente .”Nia hakotu.
Jornalista : Delfina Borges
Editór : Veraka