(Dili) Mudansa – Governu Preve osan ba Komemorasaun loron proklamasaun independénsia 28 Novembru ba dala 48, totál orsamentu ba serimónia ne’e hamutuk $.460.000.00, aleinde ne’e preparasaun mós ba komemorasaun tinan ne’e atinji ona 80%.
“Govenu Preve osan ba serimónia 28 Novembru tinan ne’e hamutuk, $.460.000.00 maibé orsamentu hirak ne’e fahe ho nia deskrisaun, balu aloka ba kada seksaun ne’ebé iha no balu liu husi prosesu aprovizionamentu,” Vise Ministru ne’e dehan iha salaun enkontru MAE, Kaikoli, Tersa 21/11/2023.
Nia relata, haree IX Governu konstitusionál iha ninia mandatu tinan 5 ne’e hakarak iha mudansa, tanba iha ne’e selebra loron istória hodi konstrui futuru iha mudansa mandatu ida ne’e.
Iha ne’ebé, Kona-ba grupu isar Bandeira responsavel husi estudante sira ne’ebé reprezenta Munísipiu 13, maibé sira ne’ebé iha ona esperiénsia tuir isar Bandeira dala 1 ou 2 metade maka fo-foun primeira vés.
“Durante semana ida sira iha ne’e, Komisaun Organizador haree katak, sira preparadu mentál ho fíziku atu bele aplika fali iha 28 Novembru ne’e ho di’ak,” Prezidente Komisaun Organizador afirma.
Nia deklara, bainaka ne’ebé sei mai partisipa komemora aniversáriu Proklamasaun Independênsia ba dala 48, mak hanesan Prezidente Giné-Bisau ho nia delegasaun no mós eis Primeiru Ministru (PM) Kanseladu.
“Preparasaun atu simu delegasaun husi li’ur inklui ninia akomodasaun ho kestaun lojístika ne’e komisaun organizadór preparadu ona hodi simu ita-nia bainaka sira husi rai li’ur,” nia hakotu.
Jornalista : Mariano Do Santos Abi
Editór : Orlando Magno
