(Dili) Mudansa – Martinho Maris Barboza nu’udar joven ida ne’ebé dadaun ne’e eskola iha Univasidade Timor Lorosa’e (UNTL) deside halo negósiu tanba lakohi depende beibeik ba inan aman ne’ebé idade avansadu ona.
Negosiante Martinho Orijen husi Munisipiu Baucau ho idade 30 deside hala’o negósiu fa’an pulsa, sigarru, maskra no hudi sona hodi selu rasik nia estudu iha (UNTL).
“Ha’u fa’an pulsa, sigarru, maskra no hudi sona durante tinan lima ona hodi selu ba ha’u-nia eskola, ha’u halo ida ne’e tanba ha’u-nia inan Aman kbiit la iha no sira nia idade mós aumenta ba dadaun ona tanba ne’e ha’u lakohi depende beibeik ba sira maibé oinsá bele ajuda sira,” Dehan negosiante Martinho ba Jornalista Media Mudansa iha Largo Lesidere, Dili kinta, 07/09/2023.
Nia konta, Martinho nia Ama liman tohar no nia apá idade ona la bele halo ona servisu servisu todan, entaun Martinho fa’an sasán ne’e hodi bele ajuda inan Aman no osan balu nia rasik uza ba ninia nesesidade loroloron.
“Ha’u halo negósiu ne’e atu ajuda netik ba ha’u-nia estudu tanba agora ha’u hala’o hela estudu iha UNTL semester 8 ona no foti fakuldade agrikultór,” Nia Afirma
Martinho iha maun alin uma laran hamutuk na’in 8 kompostu husi feto 4 no mane na’in 4 husi na’in 8 ne’e na’in 2 remata ona estudu atu kontinua iha universidade maibé Inan Aman forsa la iha entaun Martinho nia alin na’in 2 deskansa de’it iha uma.
“Ami hamutuk na’in 8 durante ha’u fa’an sasán ida ne’e selu mós alin sira nia eskola, tanba, sira iha kapasidade atu kontinua maibé tan de’it inan-Aman nia kbiit la to’o,” Informa Nia.
Martinho rekomenda, husu ba maluk joven no estudante sira ne’ebé namkari iha Timor laran tomak karik inan Aman hanesan kbiit la iha bele esforsu an hodi buka moris atu bele ajuda fali inan-aman no selu rasik eskola inklui ajuda alin sira nia eskola.
Jornalista : Gaudencia Belo
Editór : Orlando Magno
