(Oe-kusse) Mudansa – Berlin NAKROMA la konsege halo viajen husi Rejiaun Administrativu Espesiál Oekusi Ambenu (RAEOA) ba Dili, obrigadu ohin kalan pasajeiru toba de’it iha sementi laran, tanba husi 15:00.otl to’o madrugada 02:48.otl ró Berlin Nakroman la tula pasajeiru tanba deskonfia kondisaun ró aat.
Bazeia ba informasaun ne’ebé https://www.mediamudansa.com/ hetan husi pasajeiru nia status Whatsapp, tau hela imajen ida iha área Portu Kitahara Mahata RAEOA nian, ho ida ne’e tenta husu duni pasajeiru ne’e, imi seidauk mai ka?
“Sim ami sei iha hela portu Mahata, tanba ró NAKROMA aat hela, tuku tolu lokraik ami mai iha Portu Mahata to’o agora, ró ne’e sei solda hela saida mos ami la hatene entaun pasajeiru sente matan dukur mak toba deit iha semeti laran,” pasajeiru Aldo Oqui espresa nia tristeja ne’e ba https://www.mediamudansa.com/ liu husi mensajen Whatsapp iha Sábadu madrugada hale’u tuku 02:58.
Pasajeiru ne’e konta, ohin 15:00 lokraik, ró mai duni no to’o ona iha ne’e, maibé nia atraka iha sorin no rona informasaun husi Aportil RAEOA nian katak, ida-idak fila ba han lai iha uma tuku 10:00 mak mai fali.
“Ami rona avizu katak, imi ba han lai, jam 10:30 maka sa’e ro arranka maibe to’o jam 10:30 mós seidauk atraka ou sandar, lakleur ami rona dehan tasi nia volume mak tuun, rona fali dehan, tasi volume sa’e, rona tan fali ró ninia korenta kait saida maka ne’e ha’u mós la hatene entaun agora Tuku 03:00 madrugada ona ami seidauk sa’e, ró tanba Berlin Nakroma para dook husi portu,” nia deklara.
Nia konta, pasajeiru ne’ebé ohin hein iha portu Mahata atu halo viajen mai Dili kuaze ema 100 resin ne’ebé kompostu husi Joven, Adultu no Idozu sira, inklui membru Forsa FALINTIL Defeza Timor-Leste (F-FDTL) maibé balu fila ona ba uma tanba pasajeiru observa ró ne’e, muda an beibeik ba tasi klaran.
To’o notísia ne’e publika, média mudansa seidauk halo konfirmasaun ho parte relevante atu halo balansu notísia ne’e tanba oras deskansa kalan nia, ho nune’e Media Mudansa sei halo konfirmasaun bainhira oras servisu.
Jornalista : Mariano Do Santos Abi
Editór : Orlando Magno
