(DILI) Mudansa – Prezidente Comisaun Nasional das Eleisoens (CNE), Jose Agostinho da Costa Belo, Husu ba Prokurador Jeral, atu lalais hola Pozisaun sériu ba sidadaun Estranjeiru balun, ne’ebé tenta atu fó votus ba iha Eleisaun Parlamentar tinan ne’e.
Prezidente Comisaun Nasional das Eleisoens (CNE), Jose Agostinho da Costa Belo, Hato’o asuntu ne’e, liu husi Konferensia imprensa ne’ebé hala’o iha Salaun apuramentu Nasional CNE Kolmera Dili, Domingu 21/05/2023.
Nia dehan, hanoin kazu ida ne’e sériu, tanba antes kampaña iha tiha ona keixa husi partidu CNRT ninian, hato’o ona ba Prokurador Jeral. tanba ne’e nia hanoin Prokurador Jeral, agora tenke hola pozisaun ne’e lalais, adianta tanba ida ne’e sériu.
“Kazu ida ne’e hatudu ona katak iha prátika sira balu ne’ebé presiza hare, tanba keixa ne’e diretamente ba Prokurador, ha’u hanoin Prokurador tenke aselera lalais kazu ne’e, atu bele hetan esplikasaun ne’ebé klaru ba ita-nia sidadaun,” dehan nia.
José afirma, hateten, daudauk ne’e mós ekipa PNTL kaer tan sidadaun balun, Ligadu ho ida ne’e so investigasaun mak bele hatene, maibé ida ne’e kazu sériu, tanba saida mak estranjeiru iha fali kartaun Eleitoral, la’ós halo husi parte seguransa, CNE, no parte STAE, maibé individu sira.
Nia hatutan, se Wainhira ida ne’e maka envolve husi funsionáriu sira presiza hola medida kona asuntu ne’e, tanba nasaun direitu demokrasia, labele fó livre para ema halo buat sira hanesan ne’e.
Iha biban ne’e, Diretur Nasional Edukasaun Silvika Politiku Dokumentasaun No Media IT CNE, Carlos Alves Lopes, hatutan iha Munisipiu Likisa no Raeoa, identifika mós sidadaun Estranjeiru, balun ne’ebé tentativa atu vota.
“Maibe sira iha kartaun eleitór, tanba ne’e kazu ne’e, halo kedas intervensaun direita husi PNTL,” hakotu nia.
Jornalista : Esperança Monteiro Soares
Editór : Orlando Magno
