(Dili) Mudansa – Komisaria Komisaun Nasional Eleisoes (CNE) Odete Maria Belo informa, nia parte husu ba Diretor Jeral Sekratriadu Tekniku Administrasaun Eleitoral (STAE) atu haree Briganista ne’ebé tau an hanesan militante partidu di’ak liu hasai tiha duke hafo’er STAE nia naran.
Nia dehan, Briganista ko’alia sai iha kampaña hanesan partidus polítiku ne’e, kontra prinsípiu STAE ninian tanba la Neutru la transparénsia no la independente.
“Favor ida STAE toma tensaun ba iha Briganista sira ne’ebé hakarak sai militante di’ak liu rezigna an husi Brigada hodi fokus ba iha partidus polítiku duke mai iha Brigada ko’alia hanesan loos militante sira la tau an hanesan briganista maibé servisu iha STAE kontra prinsípiu ne’ebé iha.” dehan Komisaria CNE Odete ba jornalista iha salaun CNE Dili, 05/04/2023.
Komisária ne’e akresenta, hahalok sira ne’e estraga imajen STAE ne’e duni Diretór jerál tenke haree asuntu ne’e atu labele akontese iha eleisaun Parlamentar 2023.
“Bragada ne’ebé STAE rekruta tantu tinan hirak liu ba no mós tinan ida ne’e nia hahalok estraga imajen STAE nian tanba la iha transparénsia no la independente.” Odete subliña.
Iha fatin hanesan, Diretor Jeral STAE Acilino Manuel Branco, hatán ba preokupasaun husi Komisaria CNE nian hateten, Bragada hotu-hotu halo servisu hanesan liman ain Sekretariu Tekniku Administrasaun Eleitoral (STAE) nian.
“STAE hanesan Orgaun Sentral nian estrutura iha Nasional, Munisipiu no Postu presiza atensaun no kontrola ida ne’ebé másimu, ho orientasaun ne’ebé klaru hodi halo akompañamentu atitude, komportamentu no dezempeñamentu pesoál ida nian sai husi oras servisu nian.” Diretor Jeral STAE Acilino afirma.
Nia relata, Organizasaun klaru ona atu ajentes ka Funsionariu Públiku, kontratadu Lei Funsaun Publika hateten la’os iha loron servisu ka feriadu bele mete iha atividade Politika.
“Iha STAE Zero toleránsia husi Diretor to’o ba kraik mezmu iha Lei Funsaun Públika la hatete buat ruma, maibé STAE zero toleránsia tanba pozisaun no prinsípiu klaru halo tratamentu ne’ebé justu promove transparénsia garante imparsialidade neutralidade independente iha prosesu tomak hodi garante nia integridade iha aban-bainrua,” Acelino esplika.
Nia realsa, Karik Iha keixa ne’ebé hatama sei orienta notifika iha pesoál ruma komete infrasaun ruma submete ba iha regras no aproximasaun ne’ebé estabelese iha STAE.
Jornalista : Delfina Borges
Editor : Orlando Magno
