(Dili) Mudansa – Joven Leonizio Soares Hapara estudu iha iha nivel ensinu superior tanba falla iha finanseiru atu suporta ba estudu maibé nia kontinua fali suku sepatu hodi suporta ba ninia kursu lian koreia.
Tebes duni, Timor-leste menus kampu servisu Tamba ne’e joven barak mak Hili dalan Hodi Kria rasik kampu traballu ba sira nia aan maibe balu hakotu sira nia estudu.
Leonizio Soares ema Ida ne’ebe mai husi Familia simples Kria rasik Kampu servisu maski ladun hetan finanseiru boot husi atividade nee maibe Leonizio sente kontente uitoan tanba liu husi suku sepatu bele selu rasik ninia kursu neebe dadaun nee nia halao hela.
Iha Intervista husi Jornalista Media Mudansa Leonizio informa, hanesan joven ida tenke hakonu an ho hanoin ne’ebé di’ak hodi halo netik buat di’ak ruma ba família sira maski la boot.
“Iha ita-nia rain rasik menus kampu servisu tanba ne’e ha’u foti desizaun hapara ha’u-nia eskola tanba nesesidade uma laran la sufisiente tan nee hau kontinua falu halo negósiu rasik liu husi suku sepatu hodi sustenta ha’u nia an no haforsa ekonomia família uma laran,” Dehan Leonizio ba Media Mudansa iha Audian Dili, tersa (14/03/2023).
Leonizio relata, Nia hahu nia estudu iha Universidade Timor Lorosa’e (UNTL) Faculdade Educasaun Departamento Biologia iha tinan kotuk maibe nia Hili hapara Nia estudu tamba economia sufisiente atu selu ba nia eskola ho ida nee nia Suku deit sepatu no tuir Kursus lian Korea.
“Sapatu ne’ebé ha’u suku ho ninia presu depende fali ba sapatu ne’e mak toos entaun ha’u husu $3.00 dolar lae $4.00 dolar se sapatu ne’ebé mak mamar presu $2.00 dolar no kada loron ida ha’u bele hetan to’o $.20.00 dolar. maibé dala ruma mós ami hetan de’it $.5.00 kada loron no husi osan sira ne’ebé mak ha’u hetan hodi selu fila fali kós, kursus, no mós ba ami nia presiza sira,” Nia deklara.
Nia afirma, daun suku sepatu neebe dadaun nee Leonizio uza laos sosa iha merkadu ka loja sira maibe nia rasik produs daun depois mak sosa fali kabas iha loja sira.
Hanesan Joven la sente Kole maski loron tomak tuur de’it iha sumbriña nia okos hodi satán netik loron manas, tan de’it atu hetan osan uitoan hodi sustenta ba moris iha Sidade Dili no aproveita tempu ba aprende.
Leonizio mós husu ba nia maluk Joven sira ne’ebé abandonadu ka halimar de’it iha uma katak koko atu buka rasik servisu maski la’ós buat boot maibé halo netik buat ki’ik sira hanesan suku sapatu no buat seluk ne’ebé bele fo benefisiu ba moris loroloron maibe keta uza hahalok moe bainhira halo atividade negosiu.
Estajiada : Isabel de Fatima
Editor : Orlando Magno
