(Dili) Mudansa – Komemorasaun loron nasionál Juventude masakre santa krús ba dala XXXI, Sobrevivente 12 novembru Leopoldina Soares Martins “Ramkambia” hamonu matan been bainhira konta ninia terus iha pasadu 12 novembru 1991 ne’ebé sira hasoru iha semitériu santa Krus Dili tanba ema baku nia to’o monu ba rai.
Sobrevivente Leopoldina haktuir, maski ema baku nia hirus matan to’o monu iha rate laran maibé nia konsege halai husi inimigu sira iha rate laran hodi salva nia moris.
Nia konta, Leopoldina tuir misa iha Motael la sente buat ida no la ta’uk tanba idade sei ki’ik (13) la hatene saida mak atu akontese iha semitériu, maski militár indonézia hale’u ona sira oho timor oan.
“Ha’’u ho maun sira tama ba rate laran hakilar viva, entaun militár sira asaltu kedas ami hodi tiru baku ha’u-nia hirus matan dala rua to’o monu ba rai, maski sente moras maibé ha’u buka meius halai ses husi militár sira,” Sobrevivente Leopoldina konta ho matan been, ba jornalista MediaMudansa hafoin remata serimónia loron Naional Juventude iha santa krús 12/10/2022.
Nia konta, maski momentu ne’ebá idade sei ki’ik maibé brani akompaña juventude sira hamriik iha oin hodi tuir misa iha igreja Motael depois la’o hakilar VIVA to’o iha santa derrepente militár sira tiru joven balu entaun Leopolddina halai tuur iha rate sorin.
“Tekiteki ami rona maun ida dehan agora ita-nia maluk barak mate ona entaun ami ba halai ba subar iha rate laran hodi buka sorte se mak halai sai nia sei moris maibé sira la halai sai ne’e militár indonézia tiru mate hotu,” sobrevivente ne’e relata.
Nia hatete, Juventude uluk tuir organizasaun oioin maibé nafatin unidade la haree ba kór tanba hakarak Timor ukun -an unidade maibé joven balu agora tuir organizasaun lakohi kria unidade maibé hakarak mak problema de’it.
“Ha’u triste tebes ba juventude agora nia hahalok, tanba ida-idak haree ba ninia organizasaun maibé la hatene katak prosesu ukun an la’o oinsá mak ohin loron sai hanesan ne’e ,” katak sobrevivente Leopoldina
Nia rekomenda, Husu ba juventude sira hanesan jerasaun foun tenke unidade mezmu tuir organizasaun oioin nu’udar Timoroan nafatin hamutuk kaer liman metin nune’e ema seluk labele tama iha Timor tanba ,Timor ukun-an dala ida labele ba dala rua.
Jornalista : Domingas Viana
Editór : Orlando Magno
