(Dili) Mudansa – Kompaña Telkomcel fó sai rezultadu Kompetisaun Hakerek Notisia Selebra Aniversariu Ezistensia Operador Telekomcel selebra iha loron 17 fulan Setembru 2022 ba dala 10 iha Timor Leste
Telkomcel loke kompetisaun ne’e hahú hosi 30/08/2022 to’o 30/09/2022, ho tema “Ezistensia Telkomcel tinan 10,” iha ne’ebé média nasionál, MediaMudansa, Timor Post, Dili Post, Indepedente, Lafaek News, Bussines Timor no Hatutan.com mak submete sira nia produtu jornalístiku iha kompetisaun.
Ofisialmente Telkimcel Anunsia manán-na’in sira liu hosi serimónia Media Gathering ho “Tema Servi ho Domin,” servisu hamutuk ho Embaixada Repúblika Indonézia iha Timor Leste oferese formasaun Public Speaking.
Haree ba rezultadu avaliasaun hosi ekipa juri, Telkomcel halo anúnsiu no atribuisaun prémiu ba manán-na’in sira, Hatutan.com hetan primeiru lugár, ho títulu notísia, “Tinan Sanulu Telkomcel, Serví ho Domin Hafutar ho Sasadik,” ne’ebé hakerek hosi Jornalista Vito Salvadór.
Timor Post Segundu lugár, Lafaek News Terseiru lugár, Independente Kuartu lugár, no Díli Post Kintu lugár, enkuantu MediaMudansa no Bussines Timor hetan sertifikadu apresiasaun hosi Telkomcel nu’udar rekoñesimentu ba kontribuisaun ne’ebé iha hodi partisipa iha kompetisaun ne’ebé Telkomcel organiza.
Manejer Bilco & Corcom Telkomcel, Cesaltina Jannet da Rosa Maia hateten programa kompetisaun ne’ebé Telkomcel iha, atu kontribui bá hadi’a no hasa’e abilidade jornalista sira nian.
Ho nune’e, Parte Telkomcel iha esperansa katak, atividade ne’ebé Telkomcel iha fó duni impaktu pozitivu ba maluk jornalista sira hotu, nune’e labele haree ba montante orsamentu ne’ebé iha, maibé haree ba valór hosi atividade ida-ne’e.
“Telkomcel hakarak atu envolve an iha prosesu hasa’e koñesimentu bá jornalista sira, hasa’e abilidade no iha unidade ne’ebé di’ak ho jornalista sira seluk. Tanba ne’e, bom susesu ba ita hotu,” hateten nia iha serimónia atribuisaun prémiu iha Kantor Pusat Budaya Indonésia Merkadu-Lama, Díli. Tersa (15/11/2022)
Iha fatin hanesan, Sekretáriu Estadu Komunikasaun Sosiál (SEKOMS), Mericio Juvinal dos Reis Akara, konsidera kompetisaun kona-bá hakerek bá jornalista sira ne’ebé operadór Telkomcel oferese ne’e di’ak tebes no governu apresia ho inisiativa ida-ne’e, tanba bele fasilita kompetisaun nune’e hasa’e tan kualidade entre jornalista sira.
“Mai iha ne’e atu hato’o ha’u-nia agradesimentu ba telkomcel,tanba telkomcel sai hanesan ita-nia parseiru di’ak liuliu iha investór importante iha área komunikasaun” dehan nia
Nia katak, governu halo ona projetu boot ida fábrika atu aselera internét sai baratu liu e lalais liu tuir planu 2023-2024 espera fase primeiru bele remata hodi fornese internét lailais no baratu,kuandu ida ne’e akontese maka sei ajuda operadór sira telkomcel timor telekom telemor.
“Ida ne’e kontribuisaun ida ne’ebé di’ak, governu apresia inisiativa ida ne’e tanba ho fasilita kompetisaun sira hanesan ne’e atu hare ita-nia kualidade entre jornalista sira, hahú bele hatudu sira nia talentu hatudu sira nia kapasidade kompetisaun ne’ebé mak saudavel” Akara relata.
Estagiariu: Zemidonio C. M. Ximenes
Editor : Orlando Magno
