(Dili), Mudansa – Ema hotu Kriatura Maromak nian tanba ne’e iha Maromak nia oin ema hotu hanesan de’it, maibé, moris julga ema ho diferensia tanba, balu moris di’ak no balu fali moris iha terus no susar nia laran tan ekonomia ne’ebé la sufisiente ba vida kuatidiana.
Ema sira ne’ebé esforsu aan atu sustenta moris lor-loron no buka moris atu hetan hahan bikan ida hodi kalsu kabun iha loron ida, maibé, kuitadu ema balu sente nia aan moris di’ak (Riku) ona, entaun tur hateke hodi hamanasa ba ema ne’ebé faan sasan iha dalan ninin.
Situasaun ne’e akontese ba feto foinsa’e ida ho naran, Lucia Maria Fatima Alves ne’ebé hamutuk ho nia kolega ida faan es buah iha Dili laran, ho rajaun atu sustenta nia aan no mos nesesidade uma laran.
Lucia informa, moris la presiza buat hotu iha, maibé, importante maka ahi-matan dapur nian la bele mate no labele dependesia no ezize de’it ba governu ho estadu sem esforsu.
“Ha’u la preokupa, Bainhira ami faan es buah, estudante no ema servisu kantor balun haree ami hamnasa, maibé ha’u dehan di’ak liu buka rasik atu ita labele depende de’it ba estadu, hanesan funsionariu ne’ebé hamanasa ami tanba sira depende hela ba guvernu,” dehan Lucia ba josnalista Mudansa iha kolmera Dili, (Tersa, 21/06/2022).
Lucia relata, sira la sente mo’e hodi kontinua la’o hale’u sidade Timor-Leste hodi faan es buah, tanba lakoi dependensia ba família sira, maibé es buah ne’e produz husi produtu lokál hanesan, Ai-dila, Abokate, no mós hudi depois maka kahur fali susu ben ho nuuben.
Nia esplika, sira nia grupu hamutuk ema na’in 4 no eziste iha tinan 2022 maibé sira seidauk tau grupu nia naran, tuir planu ba oin tau tiha naran lori kedas ba rezistu iha server.
“Ami nain hat mai husi munisipiu Manatutu, Manu-Fahi, Ainaru, no munisípiu Bobonaru koñese malu, liu husi família kristaun mak ami kria grupu ne’e, tanba ita hare’e ema ho idade 17 ba leten balun harii ona uma kain mós sei depende ba nia Inan-Aman,” Lucia afirma.
Nia deklara, atividade ne’bé sira halo hahú tuku 10:30.am to tuku 12:00.am, deskansa uituan to’o Tuku 02:00pm kontinua fali to’o tuku 04:00pm hotu fila ba uma hodi kontinua halo atividade seluk.
Lucia ho nia kolega nain 3 remata de’it estudu iha nivel Sekundaria, la kontinua ba universidade tanba sira hare’e ema barak eskola maibé, Lucia konsidera situasaun rai laran sei nafatin utiliza sistema familiar.
Lucia esplika, ema ida bele loke kampu servisu ba nia aan hodi sustenta moris, entaun ida ne’e motiva sira atu halo bisnis tanba sira nain 4 hela de’it iha kós, entaun hakarak buka rasik no Gasta rasik.
“Ita ba eskola fokus ba ita nia aréa gradua hotu fila mai kampu traballu la iha, entaun ita lakon osan barak saugati de’it, di’ak liu ita kria kampu trabalhu ba ita nia aan, la’o ho bisnis hodi hetan osan responde ba nesesidade uma laran saida maka ita presiza,” Lucia hakotu.
Jornalita : Azelio da Cruz
Editór : Orlando Magno
