(Díli), Salaun TVE Rai-kotu,01/07/2026 – Sekretáriu Estadu Arte no Kultura (SEAK) Joel Cristóvão, ofisialmente lansa livru ho tema “Karta Ba Nai”,no apresia ba eskritor livru ne’ebe servisu ho dedikasaun tomak produs ona livru ne’e no konsidera hanesan kontribuisaun importante ba dezenvolvimentu literatura nasional.
Tuir Sekretáriu Estadu Arte no Kultura (SEAK),livru ne’e la’ós deit publikasaun ida, maibé parte husi inisiativa boot ida atu promove literatura iha Timor-Leste, liu-liu ba juventude sira. no inisiativa hanesan ne’e importante atu motiva juventude sira hodi aumenta interese ba leitura no escrita.
“Nune’e ita fó motivasaun ba foin-sa’e sira atu aprende lee no hakerek barak, tanba ida ne’e bele sai dalan ba futuru di’ak no bele halo ita sai eskritor ne’ebé la’ós deit iha Timor-Leste, maibé mos iha rai seluk,” hateten SEAK Joel Cristóvão iha diskurusu hafoin lansamentu Livru “Karta Ba Nai” iha salaun TVE-Rai kotu ,Díli 01/07/2026.
Eskritor Felismino Soriano da Costa mos hato’o apresiasaun ba apoiu hotu ne’ebé fó ba nia hodi realiza obra livru ne’e, inklui ajuda iha redasaun, dezenvolvimentu no promosaun lian Tetun iha literatura nasional no livru ne’e hakerek ho inspirasaun no grasa Maromak nian.
“ livru refere iha kualidade di’ak tebes, no iha nia laran kontén poema oioin ne’ebé esplora tema sira hanesan arte, kultura, relijiaun no kritika sosial. Livru ne’e iha total pájina 93, ho maioria hakerek iha lian Tetun, inklui Tetun Prasa no Tetun Terik. Autor mos rekomenda atu uza Tetun INL no konsulta disionáriu sira hodi hasa’e kualidade escrita iha futuru” nia deklara.
Nia hatutan,lansamentu livru ne’e sai rezultadu ida husi kolaborasaun entre Sekretaria Estadu Arte no Kultura, Autoridade Nasional Petróliu no empreza Ainai Lda, ne’ebé konsidera hanesan “pedra dahuluk” iha dezenvolvimentu literatura no kreatividade artistika iha país.
Entretantu,governu sente apresiasaun tebes ba eskritor jovem sira ne’ebé iha kreatividade no vontade atu kontribui ba arte no kultura. No governu prontu atu kolabora no kontinua apoiu eskritor sira iha futuru.
Jornalista/Estajiada :Caryn Camões
Editor :Ana Maria
