(Díli),Manleu Ana,30/06/2026- Vendadór ambulante sira husi Merkadu Manleu-Ana manifesta sira nia preokupasaun kona-ba espasu fatin fa’an ne’ebé la sufisiente tanba númeru negosiante kada loron aumenta ba beibeik, tamba Governu bandu labele fa’an sasan iha estrada ninin sira.
Tuir vendadóra Antonia da Costa Guterres hatete, kondisaun iha merkadu laran la dun diak, no espasu ba negosiante sira la sufisiente hodi halo atividade komersial.
Nia deklara katak, vendadór foun barak tama mai, nune’e sira ne’ebé uluk hela ona iha fatin diak agora tenke hela iha parte kotuk, ne’ebé halo sira nia sasan difisil atu hetan konsumidór ka folin ne’ebe diak.
“Uluk ami bele hetan to’o dolares amerikanu $15 kada loron, maibé agora dala barak hetan deit entre dolares amerikanu $3 to’o $4,” dehan Vendedora Antonia ba jornalista Media Mudansa iha merkadu manleu-ana, 30/06/2026
Iha sorin seluk, vendadóra Anita Sarmento Belo relata, senti triste tanba sasan barak la hetan sosa husi kompradór/makossa sira, nune’e nia hatete, maioria vendadór sira depende deit ba atividade negosiu sira nee hodi sustenta família, maske iha loron ida hetan deit ho rendimentu ne’ebe ki’ik.
“Dala ruma ami hetan deit dolares amerikanu $3 ka $4 kada loron. Ho rendimentu hanesan ne’e, difisil tebes atu responde ba nesesidade uma laran,” Hatutan Anita.
Entretantu, nia relata katak kondisaun fatin merkadu manleu-ana, la favoravel no susar atu hetan be’e mos no lixu ne’ebe naklekar la tuir fatin, hodi fó mos impkatu ba vendedor no komprador sira iha merkadu refere, nune’e vendedor sira husu ba autoridade relevante atu konsidera hadi’a merkadu ka muda sira ba merkadu foun ne’ebé iha kotuk atu bele garante fatin ne’ebé adekuadu no hetan rendimentu ne’ebe diak liu tán.
Jornalista :Caryn Camões
Editor :Ana Maria
