(Díli), Jardin 05 de Maio, 17/06/2026– Bainhira ema barak lao ba mai iha área Jardin 05 de Maio, Clara Rozalina Sarmento kontinua servisu ho pasiénsia iha loron-loron, nia prepara kafé no oferese nia produtu ba kliente sira ne’ebé liu ba mai ho lian hakmatek no nakonu ho determinasaun, nia hala’o nia negósiu ki’ik hodi sustenta família no luta ba futuru ida ne’ebé di’ak liu ba nia oan sira.
Clara, ne’ebé mai husi Munisípiu Baucau no agora hela iha área Ailok laran, hahú nia atividade komersiál hanesan vendedora ambulante iha Díli durante fulan rua maske dala barak ba fa’an iha Lecidere no área besik Palásiu Governu, Jardin 05 de Maio nafatin sai fatin prinsipal ne’ebé nia hili atu buka rendimentu.
Ba nia, atividade ne’e la’ós de’it maneira atu hetan osan, maibé mos sai simbolu ida ba luta no responsabilidade hanesan inan ida ne’ebé hakarak fó moris di’ak ba nia oan sira.
“Maske kole, hau la sente susar tanba hau hakarak muda moris no sustenta hau nia oan sira,” hatete Clara iha jardim 5 de Maiu 17/06/2026.
Clara hatete iha nia moris, hasoru desafiu ne’ebé la fasil, nia iha oan nain rua ida mane ho feto ida no agora mane sei tur iha banku primaria no responsabilidade atu tau matan ba sira nain rua mak sai motivasaun bo’ot ba nia atu kontinua servisu.
Nia hatutan katak desizaun atu hahú fa’an kafé no sigaru mai husi realidade família ne’ebé muda maka’as bainhira nia la’en deside hela ho feto seluk.
“Hau foti desizaun atu fa’an kafé no sigaru tanba hau nia la’en hola ona feto seluk. Nune’e, hau iha hanoin katak hau tenki prontu hasoru problema no luta ba hau nia oan sira nia futuru,” dehan nia.
Maske sente triste ho realidade ne’ebé nia hasoru, Clara la entrega-an ba difikuldade sira. Nia transforma dor no preokupasaun ne’ebé iha nia laran sai fonte forsa atu kontinua luta no servisu maka’as ba futuru nia oan sira nian.
“Maski aman lakohi ona sira nain rua, hau prontu atu sai inan no aman ba sira, moris mak hanesan nee ona, hau tenki simu realidade ida ne’e, maske todan, maibé hau sei firme nafatin ba hau nia oan sira,” hatete nia Nakonu ho sentimentu
Ho kapital inisiál apenas US$100, Clara hahú nia negósiu ki’ik liuhusi fa’an kafé no sigaru. Gradualmente, nia konsege aumenta nia rendimentu no hari’i kliente permanente balun iha área ne’ebé nia fa’an.
Agora, nia bele hetan rendimentu média to’o loraik bele hetan $25 kada loron, depende ba movimentu kliente no fatin ne’ebé nia hala’o nia atividade.
Ba Clara, rendimentu ne’e importante tebes atu kobre nesesidade loron-loron hanesan hahán, edukasaun no gastu seluk ba família, maske servisu ne’e presiza nia atu hamrik durante oras naruk no enfrenta manas no udan, nia la konsidera ida ne’e hanesan obstákulu.
Istória Clara reflete realidade vendedór ambulante barak iha Díli ne’ebé uza negósiu ki’ik hanesan dalan atu sustenta família, iha fatin públiku hanesan Jardin 05 de Maio, atividade komersiál informál kontinua sai fonte rendimentu barak ba família sira ne’ebé buka moris di’ak liu.
Iha fatin ne’ebé ema barak halibur malu ema sira iha Jardin 05 de Maio, Clara kontinua prepara kafé no simu kliente sira ho sorin, iha nia laran, nia iha mehi simples ida de’it haree nia oan sira ho di’ak no hetan oportunidade ne’ebé di’ak liu husi ne’ebé nia rasik hetan iha moris.
Jornalista/Estajiada :Caryn Camões
Editor : Ana Maria da Silva
