(Díli) Comoro- Prezidente República José Ramos Horta apresia ho inisiativa veteranu sira nian hodi hari’i Banco do Nosso Futuro (BNF sigla português) ne’ebé kria husi Konsellu Kombatente Libertasaun Nasionál (CCLN) hodi fasilita veteranu no públiku sira kontribui ba dezenvolvimentu ekonomia rai-laran.
Iha diskursu, Prezidente Repúblika (PR) José Ramos Horta hatete, nia parte hato’o apresiasaun bo’ot ba veteranu sira tanba bele kontribui $55 milloeñs ba Fundu Dezenvolvimentu Veteranu, (FDV) hodi inisia hari’i Banco do Nosso Futuro (BNF).
“Ha’u nia apresiasaun ba imi hotu, imi konsege akomula fundu dezenvolvimentu veteranu $55 milloeñs, signifika hatudu imi nia komitmentu, ha’u admira, ha’u la espera imi-nia ideia, parabéns no hakuak bo’ot ba imi, imi nia komitmentu no dedikasaun ba objetivu komún, hatudu admirasaun tanba buat ida ne’e mosu liu husi expetativa veteranu sira nian”, dehan PR Horta liu husi nia diskursu, Iha resintu MACLN, Comoro, 04/09/2025.
Iha fatin hanesan, Ministru Asuntu Kombatente Libertasaun Nasionál (MACLN), Gil da Costa “Oan Soru” salienta, Banku do Nosso Futuru (BNF) mak banku ida ne’ebé kria husi ideolojia ne’ebé veteranu sira rekomenda ba Konsellu Kombatente Libertasaun Nasionál (CCLN), ho objetivu atu ajuda kombatente, veteranu no públiku sira iha futuru.
“Esforsu saida mak veteranu sira halo, ohin hodi eziste banku ida la naran banku veteranu, maibé naran Banco do Nosso Futuro, motivasaun saida mak ita halo buat ida ne’ebé la proteje husi lei maibé nakfilak ba proteje husi lei, motivasaun hari’i BNF mai husi hanoin ema veteranu sira nian, ” Dehan Ministru MACLN.
Nune’e nia hatutan, progresu konstrusaun edifisiu Banco do Nosso Futuro ideia no rekomendasaun ne’ebé veteranu sira hato’o ba (CCLN) durante tempu naruk, sosializasaun iha 13 munisípiu no hosi konsultasaun estrutura rezistensia tomak no ikus halo sosializasaun haleu postu adminitrativu 65 iha territóriu tomak.
“Aliende ne’e ita la’o haleu postu adminitrativu hotu hodi husu opiniaun no aseitasaun hodi hetan lejitimidade liu husi kongresu CCLN nian ne’ebé hala’o iha fulan dezembru 2019, entaun ideia ne’ebé ita-bo’ot sira rekomenda, ohin ita hahú lansamentu banku ida ho naran BNF hanesan reflesaun ba pasadu, esforsu ne’ebé veteranu sira halo, orsamentu ba edifisiu Banco do Nosso Futuro ho montante $ 5 milhoens ne’ebe finansia husi Fundu Dezenolvimentu Veteranu (FDV) tanba hetan kontribuisaun husi veteranu sira iha territóriu nasionál liu husi deliberasaun Kongresu Nasionál Konsellu Kombatente Libertasaun Nasionál iha tinan 2019”, hakotu “Oan Soru”.
Jornalista: Rogerio Anuno
Editora: Sandi Belo.
