(Internasionál)- Ema ida mate iha inséndiu rezidensiál ida iha Califórnia hafoin fogu artifisiál sira nakfera iha garajen ida iha véspera loron ha’at fulan-Jullu nian, haktuir hosi polísia.
Ekipa emerjénsia sira responde iha meiudia Kinta-feira ba inséndiu iha uma iha Simi Valley, ne’ebé lokaliza iha Kondadu Ventura iha área bo’ot Los Angeles nian.
Esplozaun sira relata iha garajen laran, tuir polísia.
“Esplozaun sira ne’e determinadu hanesan fogu artifisiál, ne’ebé rezulta ema ida mate”, hatete hosi Departamentu Polísia Simi Valley nian iha komunikadu. “Ahi ne’e da’et hosi garajen ba sótiru no tama ba uma laran.”
Polísia la fó sai detallu ruma kona-ba vítima.
Autoridade sira husu ba ema sira atu evita área ne’e tanba ekipa bombeiru sira serbisu hodi hamate ahi.
Insidente ne’e sei iha hela investigasaun nia laran.
Thomas Kudlick, ne’ebé hela iha dalan sorin seluk hosi rezidénsia, hatete ba estasaun ABC Los Angeles KABC katak nia sai hosi nia uma hafoin rona “esplozaun bo’ot ida”.
“Ha’u bele hare’e katak garajen ne’e monu,” nia hatete ba estasaun. “Iha minutu balun nia laran, iha esplozaun barak liután no suar ho ahi barak liután.”
Fontes: ABC News
