(Internasional)-Prezidente Estadus Unidus Donald J. Trump fó sai avizu makas ba nia aliadu besik, Israel, atu hapara nia planu sira hodi bombardea Iraun. Deklarasaun ne’e halo iha situasaun krítiku ida hafoin anúnsiu atu sesárfogu entre nasaun rua refere.
Liuhusi publikasaun sira iha mídia sosiál no iha deklarasaun ofisiál ida antes nia sai hodi tuir Simeira NATO nian iha Haia Olanda, Trump hatete:
“ISRAEL. DO NOT DROP THOSE BOMBS. IF YOU DO IT IS A MAJOR VIOLATION. BRING YOUR PILOTS HOME, NOW!”
Hatete husi Donald J. Trump, Prezidente Estadus Unidus nian
Deklarasaun forte ne’e mosu iha oras balun hafoin Trump afirma katak nia maka mediadór ba sesárfogu entre Israel ho Iraun.
Maibé, relatóriu sira husi mídia oioin sujere katak Israel sei konsidera hela hodi halo atake adisionál sira ba iha teritóriu iranianu, atu aumenta preokupasaun sira husi Trump katak akordu dame nian bele monu antes implementa tomak.
Sita relatóriu sira husi Reuters, Times of Israel, no Al Jazeera, tuir informasaun, Trump kontakta diretamente ho Primeiru-Ministru Israel Benjamin Netanyahu, no fó avizu katak asaun militár tuirmai sei konsidera hanesan “violasaun boot” ida husi akordu.
“Ha’u presiza Israel atu kalma. Labele soe bomba sira-ne’e. Lori imi nia pilotu sira ba uma”, Trump hatete, haktuir husi Times of Israel.
Situasaun iha rejiaun ne’e mantein nafatin. Komunidade internasionál hein hela atu haree se Israel sei kumpri instrusaun direta husi Prezidente Estadus Unidus Amérika nian, ka foti dalan rasik ne’ebé bele estraga diplomasia ne’ebé harii daudaun.
Fonte: (Times of Israel & Aljazeera)
