(Ajerbaijen)-Mudansa: Jornalista Gaudencia Belo husi Média Mudansa hetan Oportunidade hodi tuir konferénsia COP29 iha Baku durante semana ida ho balu, laos média Mudansa mesak mak hetan Oportunidade, maibe iha mós jornalista husi Neon Metin, Adroaldo de Almeida.
“Ha’u senti kontenti tebes tanba bele Partisipa iha konferénsia COP ne’e no bele hetan oportunidade, sai hanesan reprezetante Média Mudansa nia hodi mai tuir konferénsia COP no mós bele hala’o kobertura iha COP kona-ba issu Mudansa Klimátika ne’ebé mak akontese iha mundu tomak, liu-liu Timor-leste ne’ebé sempre akontese mós Mudansa klimátika, no bele aprende buat foun iha konferénsia COP ne’e,” Dehan Jornalista Gaudencia Belo
Nia informa tan, partisipa iha COP ne’e oinsá hodi bele hetan esperiénsia no aprende liu tan issu ba Mudansa klimátika nian, tanba konferénsia ne’e sei la ko’alia buat seluk maibé sei ko’alia kona-ba Mudansa Klimatika no meiu ambiente nian.
“Benefísiu husi konferénsia COP ne’ebé mak ha’u Sei aprende durante semana ida ho balu kona-ba matéria Mudansa Klimátika nian, ha’u bele fahe fila fali ba maluk sira ne’ebé mak seidauk komprende lolos kona-ba mudansa klimátika, oinsá atu adapta ba Mudansa klimátika ne’ebé akontese iha mundu tomak liu-liu Timor-Leste,l”, Nia relata
Enkuantu iha konferénsia ne’e jornalista bele foti issu ne’ebé mak importante, espera katak tuir konferénsia COP ne’e bele ajuda hodi komprende liu tan kona-ba Mudansa Klimátika, oinsá ba futuru bele fó hanoin ba komunidade sira atu kuidadu ambiente ne’ebé mak di’ak iha futuru oin mai.
Viajen naruk ida-ne’e sai hanesan dedikasaun lolos ida ha’u atu rezolve problema ambientál sira, liu-liu iha istória ne’ebé atu halo kobertura COP ne’e mak iha momentu ne’ebé Timor-Leste hetan inundasaun iha loron 4 fulan Abril tinan 2021, ne’ebé mak rezulta ema barak lakon vida, uma no sasan uma laran.
Entertantu jornalista Timor-leste nian ne’ebé tuir konferénsia COP29 iha Baku hamutuk nain rua mak hanesan jornalista Gaudencia Belo husi Média Mudansa no mós Jornalista husi Neon Metin Adroaldo de Almeida no komesa hala’o viajen husi Timor iha loron 16 fulan Novembru tinan ne’e, no to’o iha Baku iha loron Domingo oras tuku 9 kalan.
Jornalista: Gaudencia Belo
Editóra: Sandi Belo
