(Díli) Mudansa – Prezidenti Admistrasaun Konsellu Kombatentes Libertasaun Nasionál (CCLN sigla portugéz) hamutuk ho Sekretáriu Estadu Toponímía Organizasaun Urbana (SEATOU) no Sekretáriu Estadu Terras no Propriedades(SETP) harahun fatin Eis-Dolok Kolmera ne’ebé tuir planu sei harii Banku ba Veteranus iha tempu badak.
“Fatin ida ne’e atu hari’i Banku Veteranus nia tanbá ida ne’e maka ami hatama pedidu bá Sekretáriu Estadu ikus mai ami bá ko’ália ho Ministru Justisa hodi hamamuk fatin ida ne’e hodi Veteranus sira hari’i Banku, ida ne’e kuandu baku rahun hotu bele dehan katak molok fulan ida ne’e remata ami bo’ok ona para halo konstrusaun’’dehan Prezidenti CCLN Vidal de Jesus Kodigu ”Riak-Leman” bá Jornálista sira iha Eis-Dolok Kolmera kinta-Feira,(04/07/24)
Governante ne’e akresenta, antes atu hamamuk fatin ne’e, ekipa hosi Konsellu Kombatentes Libertasaun Nasionál (CCLN sigla portugéz) mós halo ona diálogu ho komúnidade sira ne’ebé hela iha fatin Eis-Dolok Kolmera liu hosi Vise-Prezidenti Marito Reis,maibé komúnidade balun la koopera, ho nune’e Prezidenti rasik mak hasoru diretamente ho komúnidade sira ikus nia rasik halo pedidu hodi hato’o bá Ministeriu Asuntu Veteránus no hetan aprovasaun osan hodi halo indeminizasaun bá komúnidade sira ne’ebé hela iha fatin Eis-Dolok Kolmera.
“komunidade ne’ebé hela iha ne’e fou-foun ami haruka ha’u nia Vise-Prezidenti Marito Reis mai primeiru konsentra ko’ália ho sira balun lakohi koopera tuir fali ha’u mai tan, ha’u maí fou-foun iha uma-kain hamutuk rua-nulu resin tolu (23) de’ít ha’u fila tiha uma-kain sa’e bá tolu-nulu resin-ida (31), tanbá ne’e ha’u halo pedidu ida bá Ministeriu Asuntu Veteránus, osan fahe bá uma kain (31), no falta ida de’ít mak la simu niasei bá hela iha foho ne’ebá la interese ohin tenki ser halo despezu admistrativu hosik fatin ne’e mamuk para ita hala’o servisu no atu hari’i Banku Veteránus nian iha ne’e,”Nia afirma
Iha fatin hanesan Sekretáriu Estadu Toponomía no Organizasaun Urbana (SEATOU) Germano Santa Brites mós hatutan, sira nia parte halo apoiu bá CCLN liu hosi pedidu ne’ebé maka hosi parte CCLN submete ona bá ekipa SEATOU atu normáliza fatin ne’e hodi halo konstrusaun tuir planu CCLN ne’ebé sei hari’i Banku bá Veteránus sira.
“Ami mai apoiu bà pedidu ne’ebé maka hosi Veteránus sira, atu normáliza fatin ne’e, dadus kompletu ne’e mai hosi Prezidenti Veteránus, ami mai normáliza fatin ne’e halo didi’ák para depois bele halo konstrusaun iha ne’e’, dehan SEATOU Germano Santa Brites Dias
Nia haktuir pedidu ne’ebé hosi parte SEATOU simu kuaze fulan ida ona, sira nia parte mós halo ona diálogu ho komúnidade sira, no komúnidade mós koopera tebes ho ekipa lideradu sira no ikus konsege hosik hela fatin Eis-Dolok Kolmera hodi fila hikas bá idak-idak nia rezidénsia antes.
” Ha’u simu karta pedidu kuaze fulan ida ona ami fó tiha ona etapa hira mak ami liu ona, diálogu maluk sira iha ne’e sira koopera tanbá ne’e mak ami mai,” tenik nia.
Iha sorin seluk Sekretáriu Estadu Terras no Propriedades (SETP) Jaime Xavier Lopes, hatutan, pedidu ne’ebé hosi parte Veteránus sira hato’o bá parte (SETP), kuaze tinan ida ona, atu hari’i Banku bá Veteránus iha Eis-Dolok Kolmera, fatin ne’e mós hosi parte Banku sira iha Timor-Leste observa katak merese duni atu hari’i Banku bá Veteránus sira.
“Pedidu ne’e antes iha tinan ida hosi Veteránus sira husu bá Terras Propriedades atu hari’i Banku iha ne’e, ne’ebé iha fatin barak mak haree katak ida ne’e maka serve duni hari’i Banku, tanbá besik BNU, Mandiri, BRI, ne’ebé sira haree katak ida ne’e serve duni atu hari’i Banku bá Veteránus iha ne’e,” tenik SETP Jaime Xavier Lopes
Nia salienta hari Banku ba Veteranus tanba,iha Timor seidauk eziste Banku ida atu atende bá Veteránus sira nomós Vetersnus nia oan, bainhira sira presiza atu halo levantamentu ruma, tanbá ne’e maka hosi parte Veteránus hakarak ezizi tenki hari’i banku bá Veteránus, iha Timor-Leste liu hosi Orsamentu ne’ebé maka kada fulan koa sálario Veteránus sira nia.
“Ita haree katak banku sira mosu iha Timor ne’e barak teb-tebes, maibé banku ida ne’ebé atu atende bá Veteránus sira nia oan ema sira Veteránus nia família atu halo levantamentu ruma presiza Banku Veteránus nia ida hari’i iha Timor ne’e para atu bele fó sólusaun bá ida ne’e, tan ne’ e maka sira ho ezizénsia tebes presiza uma iha ne’e husu bá Terras Propriedades atu identifíka fatin lolós nemak Dolok ne’e ne’ebe prontu notifíkasaun saí tiha ona ema la iha maka harahun de’ít buat ne’e sé despezu karik ema iha laran mak ita hasai buat hotu ema mamuk tiha ona nemak harahun edifísiu ne’e la’os hasai ema, ema iha oin la iha ida só ida mak la iha na telfone iha ne’e la iha sasan ne’e ema la iha mak sira hasai iha liur de’ít signifika la’os halo despezu no la’os halo eviksaun,maibé prepara atu hari’i edifísiu ne’e,”Nia akresenta,
Entertantu komúnidade sira ne’ebé maka hela iha fatin Eis-Dolok Kolmera uma kain hamutuk (31) no hosi parte CCLN halo ona indeminizasaun ho montante osan dollar “rihun sanulu-resin lima” ($15.000.00)no kada uma kain ida hetan osan ho montante dollar “atus-lima” ($500.00) falta de’ít uma-kain ida maka seidauk simu ho razaun bá tiha area rurál.
Jornalista : Remigia Locateli/Gaudencia Belo
Editóra : Delfina Borges
