(Dili) Mudansa- Relasiona ho akontesimentu fenomena naturál inundasaun ne’ebé kauza hosi udan ho intensidade bo’ot iha loron 09 fulan Janeiru tinan ne’e, Xefe Aldea 04, Kaikoli informa, iha nia parte, rekolla ona uma kain 229 nu’udar afetadu ba fenomena ne’e.
Kuaze oras ha’at nia laran udan ho intesidade forte liu halo be’e nalihun iha estrada hodi difikulta no afeta ba komunidade Kaikoli, akontesimentu ne’e komunidade balun tenki husik hela fatin evakua ba iha Autoridade Protesaun Sivíl (APS) maibé la’ós Aldeia 04 de’it maibé aldea seluk mós, hanesan Aldeia 05 hetan afetadu makaas tanba kondisaun uma estragus hotu nomós hahan, toba fatin, inan isin rua no inan ho bebe nurak ba hotu APS.
“Husi ami aldeia 04 kuaze uma kain hamutuk 229 mak hetan afetadu, husi uma kain Sanolu resin mak evakua ba APS,” Hatete Xefe Aldeia 04 Sr. Julio do Carmo ba jornalista Média Mudansa iha Aldea 04, Kaikoli hafoin rekolla dadaus afetadu, Kuarta, 10/01/2024.
Nia akresenta tan populasaun afetadu Aldeia 04 evakua duni ba Autoridade Protesaun Sivíl (APS) maibé APS labele simu hotu vitima sira ne’e tanba Aldeia husi 01 to’o 05 mós afetadu hotu, tanba ne’e husi númeru ne’ebé bo’ot liu no fatin salaun APS klot tan ne’e simu de’it mak hanesan inan isin rua, inan ho bebe nurak, labarik no ema deifisiensia.
“Komunidade balun ne’ebé lakonsege asegura iha APS, sira fila fali mai hamoos sira nia fatin, ohin ha’u ho ha’u nia delegadu rekolla dokumentus hanesan fixa família no eleitoral hodi prosesa afetadu vítima sira no ba sira ne’ebé evakua ba APS ne’e to’o agora seidauk fila mai hela fatin tanba Be’e lihun seidauk maran.” Dehan Julio do Carmo
Iha sorin seluk, Responsavel estudante St. Inacio de Loyola Rumbia, Ana Paula Martins hetete, iha sira nia hela fatin Kaikoli aldeia 04, Tempu udan bo’ot ka ki’ik sempre kongreasaun ne’e hetan afeita tanba valeta klot, kuandu udan be’e husi leten mai sempre tama sira nia fatin, wainhira be’e nakonu ona mak tama ba vizinus sira.
Feto: Jaime Ornai
“Kuaze kuartu hirak ne’e ami hamoos hela de’it no ami iha ne’e mesak estudante de’it no Amu sira mós la iha ne’e, ami hamutuk nain 34, mane nain 4 no feto nain 30, husi ne’e nain 4 de’it mak sekundária no ami hotu universidade, kuandu ba eskola lasai hotu ida ka rua mak iha ne’e hodi salva sasan maibé lakonsege salva hotu hanesan sasan dapur nian,” dehan , Ana Paula Martins
Komunidade afetadu Amaro de Jesus Nunes ne’ebé asegura ona iha Autoridade Protesaun Sivíl (APS) reforsa tan katak iha sira nia fatin afetadu ba inudasaun bebeik ona kuaze tinan tolu ona até agora.
“ Ha’u ho inan bebe nurak no labarik sira mak evakua ona ba APS, kuaze bee tama hotu ami nia uma laran, kuartu sira, ne’e, dapur no ami tauk hodi halai ba APS.” Dehan Amaro
Iha Tempu hanesan, tuir komunikadu imprensa ne’ebé Média Mudansa asesu, Presidente Autoridade Protesaun Sivil, Sup. Polísia Ismael da Costa Babo relata akontesimentu inudasaun horseik husi 14h00 to’o 18h00, akontese udan ho intesidade forte iha teritoria Timor laran tomak inklui munisípiu Díli ne’ebé ho totál populasaun afetadu ba inudasaun hamutuk nain 132 mak evakua ba iha Salaun APS, mak hanesan labarik ki’ik husi idade 0-6 hamutuk nain 76, inan isin-rua hamutuk nain 6, inan ne’ebé fó susu ba bebe hamutuk nain 13, ema ho Difisiensia fisiku nain 2 husi idade 10 nain-ida ho idade 60 nain-ida, husi inan feton sira husi idade 16-59 hamutuk nain 30 no inan feton ho idade 60 hamutuk nain 5.
Husi APS nasional ho APS munisípiu Díli kontinua apoiu emerjénsia no halo asesmentu ba dadus evakuasaun vítima sira, parte ekipamentus Bombeirus halo ona intervensaun ba tesi ai iha sidade Díli ne’ebé monu no taka dalan nomós kordena ho liña Ministerias hanesan Ministeriu Obras Publika (MOP) normaliza dalan no Ministeriu Saúde liu husi sentru saúde fó ona asistensia médiku ba família afetadu ne’ebé evakua iha Salaun APS.
Jornalista : Jaime Ornai
Asistente Editór : Delfina Borges
