(Dili) Mudansa – United States Agency for International Development (USAID) liu husi United Nations Children’s Fund (UNICEF) lansa fundus ba Minísteriu Saúde (MS) ho montante $.1.35 milloens hodi apoiu Timor-leste ba prevensaun no responde ba Covid-19 faze 4 nian.
Vise Ministru MS ba Fortalesimentu Instituisaun Saude, José Magno, hateten ho asina ida ne’e hanesan kontinuasaun faze primeiru ho montante $.500.000, faze daruak $.1.5 Milão, faze datoluk $.900 Míl no ida $.1.35 milloens ne’e ba faze dahaat nian.
“Ohin ita halibur hamutuk iha ne’e, atu lansa apoiu orsamentu USAID ba UNICEF hodi suporta ou responde Covid-19 no haforsa sistema saúde iha Timor-Leste, tanba, ida ne’e kontinuasaun husi faze dahuluk no ohin loron ba faze dahaat ninian,” ministru Saude Jose hatete hafoin serimónia lansamentu iha salaun enkontru Palásiu da Sinzas, Kaikoli Kinta 09/11/2023.
Nia haktuir, USAID ho UNICEF maka hanesan parseiru ida ne’ebé variadu tebes ho MS, parseiru rua ne’e fó apoiu barak tebes iha área oin-oin inklui pandemia Covid-19 nian, ne’e duni USAID ho UNICEF mai hamutuk no tau hamutuk.
“ita konsege hadi’a fasilidade bee moos no saneamentu iha fasilidade saúde hotu iha Munisípiu alvu sira. Ida ne’e ajuda tebes ba melloramentu ezisténsia saúde, seguransa, pesoál saúde no benefísiu ba komunidade sira ne’ebé mai buka asisténsia iha saúde,” nia akresenta.
Iha fatin hanesan reprezentante País UNICEF Timor-Leste, Bilal Aurang Zeb Durrani, informa, nu’udar ema Timor-Leste nia saúde no moris di’ak, hodi halo koordenasaun ne’ebé presiza tebes ho parseiru dezenvolvimentu sira no lidera liu husi kurva aprendizajen oin-oin ne’ebé mai ho pandemia.
“Ha’u mós rekoñese USAID nu’udar primeiru parseiru ida-ne’ebé mai kedas iha faze sedu pandemia nian, hodi suporta Timor-Leste atu dezeña no ezekuta resposta COVID-19 nian, ne’ebé ha’u fiar katak, ami hotu konkorda ajuda hodi minimiza impaktu pandemia nian,” nia dehan.
Lansamentu ba faze dahaat sei tulun atu mantein dinámika hodi prepara pais ne’e hasoru dezafiu sira iha futuru.
Tanba programa ida ne’e hala’o papél importante hodi fornese sasán sira ne’ebé salva moris no sofrimentu protesta pesoál ba pesoál saúde sira iha tempu ne’ebé kadeia fornesimentu globál paralizadu no bainhira nesesidade globál ne’e aas liu.
Programa ida ne’e mós liga ho lakuna krítiku sira iha bee no saneamentu, ne’ebé sai hanesan problema ne’ebé hasoru iha Sentru Saúde Komunitaria.
“Ami kontente tebes tanba, to’o faze ida ne’e serbisu Bee, ljene no Saneamentu (BESI) melloradu ona iha sentru saúde komunitária hotu-hotu iha munisípiu 10, kualidade serbisu saúde hotu-hotu ne’ebé fornese husi Sentru Saúde Komunitaria,” Bilal Aurang Zeb Durrani, relata.
Durante períodu programa tomak, funsionáriu tékniku no jestaun seniór sira husi Ministeriu Saúde, USAID no UNICEF hamutuk vizita ona munisípiu sira hodi monitoriza implementasaun no mós hatudu mensajen importante sira.
Jornalista : Mariano Do Santos Abi
Editór : Orlando Magno