(Dili) Mudansa – Husi Investimentu Individu Kuda Modo, Familia Uma Laran Hari Grupu Ho Naran Jerasaun Matebian ne’ebé lidera husi Kordenador Jerasaun Matebian (JM), Alfredo da Silva Pinto oinsá atu hala’o atividade hortikultura nia hodi kria rasik kampu servisu no sustenta família uma laran.
Grupu jerasaun Matebian totál membru hamutuk na’in 19 maibé husi hirak ne’e na’in 8 hala’o atividade kuda modo iha Hera no na’in 11 mak servisu kuda modo iha área Loes munisípiu Likisa, iha ne’ebé toos iha Loes ektares 2 no mós iha Hera hektar rua.
Koordenadór Jerasaun Matebian informa, sira nia atividade kuda modo hahú iha tinan 2019 to’o agora no modo ne’ebé sira kuda mak hanesan kankung, mostarda, brinjela, baria no mós fore talin.
”Husi ami nia grupu ka família uma laran ho inisiativa rasik halo kreatividade ba hortikultura ne’ebé la’o ona kuaze tinan haat,” Dehan Vise Kordenador Jerasaun matebian, Alfredo da Silva Pinto ba jornalista Media Mudansa iha Hera Dili Quinta Féria 09/11/2023.
Nia haktuir, atu Koileta ba fa’an tuir ninia tempu de’it dala ruma tau iha pájina Facebook ne’e rasik dala ruma ema balun husu to’o mai iha fatin ne’ebé sira servisu ba ka kuda modo fatin ne’e dala ruma mós sira kolleita tiha lori ba fa’an iha merkadu Taibesi.
“Bainhira ami fa’an fali modo Folin sa’e liu maka futun boot ida $.5.00 ou $.6.00 maibé ita hare fila fali ba movimentasaun ema nia ka vendedór sira mai sosa iha ne’e entaun ami fo futun ida $.4.00 tanba ita mós hanoin sira nia transporte ba mai,” nia relata.
Nia deklara, vantajen husi kuda modo ne’e maka, oinsá halo atividade hortikultura ida hodi fornese ka investe nesesidade loroloron liga liu ba prosesu estudu, nesesidade movimentasaun ba nesesidade uma laran no nesesidade família sira tomak ne’ebé iha grupu jerasaun matebian.
Nia dezvantajen mak inísiu husi prosesu ne’e rasik hakat ho erru boot sira ne’ebé iha mak hanesan ba aluga ema nia rai depois aluga hotu hare ba traballadór sira ne’ebé servisu iha laran nafatin motiva iha tempu fila rai, suru rai ne’e mós prosesu lubuk ida servisu todan.
Traballadór ho Kordenador sira halo kooperativa ho di’ak oinsá atu kontribui ba prosesu kuda modo tanba servisu ne’ebé todan atu kuda modo ou produtu sira ne’ebé iha sempre hasoru erru ka problema ne’ebé liga liu ba atividade loroloron iha toos laran.
“Trabalhador ida ami kontratu iha parte rua ida maka, ami selu fulan ida $.120.00 tuir ami nia forsa ka rendimentu ne’ebé iha depois kolleita ona modo sira ne’e ba fa’an hetan ami fahe hanesan de’it,” nia deklara.
Atendimentu ne’ebé hala’o iha atividade hortikultura ka kuda modo ida ne’e primeiru tuir ninia trimestrál ka fulan ida nia rendimentu mai iha investimentu nia fatin ka administrasaun oinsá Atu haforsa grupu ne’e nia kas hodi sosa ekipamentus ne’ebé presiza.
“Se rendimentu ne’e sa’e ita tau prioridade uluk maka tenke iha transporte ruma ne’ebé aloka fila fali atu distribuisaun sasán mai iha merkadu nasionál no mós ita hare ba volume osan ne’ebé mai husi kolleita ne’e aloka fila fali ba fini sira ne’ebé atu kuda hikas,” nia afirma.
Ida tan maka, osan sira ne’ebé tama sira mós sei aloka fila fali ba materiál sira hanesan mangeira, mesín supa bee nian no mós iha tanke ne’ebé atu rega ular no rega modo halo buras sorin seluk mak uza mós ba nesesidade loroloron nian hanesan han, hatais no selu eskola.
Jornalista : Esperança Monteiro Soares
Editór : Orlando Magno
