(Manufahi) Mudansa – Eskola Basika Central Turiskai ne’ebé lokaliza suku Manumera postu administrativu Turiskai munisípiu Manufahi Menus kadeira ho meza ba estudante sira hodi difikulta prosesu aprendizajen iha sala laran.
Diretór Eskola Sentral Turiscai Abel de Jesus informa, preokupasaun ne’ebé durante ne’e eskola refere hasoru mak menus fasilidade kadeira ho meza tanba durante ne’e estudante na’in rua tuur hamutuk iha kadeira ida hodi tuir prosesu aprendizajen.
“Durante ne’e ami hasoru problema barak ba fasilidade eskola nia liuliu ba kadeira meza menus tebes tanba estudante na’in 2 lae na’in 3 tuur hamutuk iha kadeira ida de’it hodi tuir prosesu aprendizajen” dehan Diretór Abel ba jornalista iha parókia Nossa Senhora de Fatima Turiskai kinta feira 31/08/2023
Nia subliña, iha eskola ne’e menus mós professores tanba dadaun ne’e profesór ne’ebé hanorin iha ne’e hamutuk 70 maibé estudante hamutuk 1791.
“Kuandu profesór sira la sufisiente hakarak ha’u tenke limita turma 2 tama hamutuk iha sala ida hodi fó ba profesór ne’ebé fasilita sira tanba profesór ida bele hanorin sala 2,” nia afirma.
Abel relata, nia parte hatama ona karta ba ministériu edukasaun kona ba profesór na’in 11 ne’ebé mate no profesór na’in 5 ne’ebé moras maibé to’o agora seidauk substitui ida ne’e mak EBC Turiskai presiza tan profesór foun hodi bele aumenta Professorhodi hanorin matéria portugés, matemátika iha siénsia naturais.
Eskola Basika Central Turiscai ninia Filial hamutuk 6 mak eskola Filial Aitemua ,EBF Beremano ,EBF Kaimauk ,EBF Furaklau ,EBF Manumera ikus liu EBF Mindelu ,entre sanak ne’e eskola ida to’o ona iha klase 9 hanesan EBF Aitemua tanba bainhira tempu udan estudante sira ba eskola ladi’ak entaun ami hasa’e tan to’o ensinu sekundáriu mak sira mai iha Turiskai ba futuru presiza duni enfraestrutura kadeira meza no profesór.
Hatán ba kestaun ne’e Ministra Edukasaun Dulce de Jesus haktuir la’ós eskola Turiscai de’it mak hasoru infraestrutura maibé iha eskola barak ba hasoru problema presiza hodi halo reabilitasaun
“Daudaun ne’e ami halo hela kuadru pesoál ita iha estudante hira no profesór hira turma hira no sala hira husi ne’ebá mak ita deside katak ita presiza tan profesór, kadeira meza no eskola balun halo reabilitasaun fila fali,” Dulcia esplika
Dulce deklara, Ministeriu Eduksaun iha ona planu atu halo maibé sei iha hela fazeadamente tanba orsamentu ne’e la’ós ba ministériu edukasaun de’it maibé halo desizaun ida tuir ninia kritéria hodi halo levantamentu ho didi’ak iha tinan ne’e.
Jornalista : Domingas Viana
Editór. : Orlando Magno
