(Bobonaro) Mudansa – Prezidente Repúblika (PR), José Ramos-Horta, vizita oan-kiak na’in tolu (3) no haree kondisaun neebe komunidade infrenta iha Aldeia Mabelis, Suku Leber, Postu-Administrativu Bobonaro, Munisípiu Bobonaro tanba ne’e Xefe Estadu sei ko’alia ho Governu atu hadi’a kondisaun iha área refere.
“Mai iha ne’e, la’ós de’it hare sira na’in tolu, maibé hare mós situasaun komunidade nian no sei hare eskola ne’e hodi hadi’a, tau matan ba agrikultura no produsaun koto, sei ko’alia ho Governu hodi hetan folin di’ák liu,” esplika PR Horta ba Komunidade sira iha Mabelis, Sábadu 19/08/2022.
Tuir informasaun ne’ebé Média Mudansa asesu iha ekipa Prezidente Repúblika katak, relasiona ho antes ne’e, Xefe Estadu Horta preokupa kondisaun moris oan-kiak na’in tolu, ne’ebé abondonadu tanba inan mate no aman husik hela sira la’o ba fatin dook.
Madalena Moníz, tinan-14, nu’udár oan-feto bo’ot hodi tau-matan mesak ba nia alin na’in rua, Cesaltina Moníz, tinan-8 no Rofina Moníz, tinan-5, nune’e, bainhira rona, Xefe Estadu orienta liu husi Gabinete Sosiedade Sivíl no Apoiu Sosiál Prezidénsia Repúblika, lori kedas ba Dili kuaze semana rua-resin ho Xefe Estadu no fila hikas mai iha sira nia horik fatin iha loron-2 fulan Maiu liuba.
Ho saudades, aproveita selebrasaun loron-FALINTIL ne’ebé sei hala’o iha Munisípiu Bobonaro iha Domingo ne’e, Horta ne’ebé akompaña hosi hakerek-na’in Luis Cardoso ‘Takas’ no família vizita hikas no lori mós apoiu hanesan nesesidade báziku no promote sei hadia sira nia uma.
Xefe Estadu konsidera aldeia Mabelis izoladu no preokupa movimentasaun transporte iha area Mabelis ne’ebé rurál liu no sempre utiliza kuda ba transporte.
Prezidente Repúblika realsa, sei ko’alia ho membru Governu atu fó apoiu maka’as tanba konsidera prioriedade atuál mak estrada, agrikultura, saúde no edukasaun.
Nune’e mós PR Horta sei fó atensaun ba Nonu Governu konstitusionál atu tau prioriedade ba eletrisidade iha fatin sira ne’ebé seidauk asesu liu-liu iha suku Leber ne’ebé tama iha lista % 4, seidauk assesu ba eletrisidade iha teritóriu nasionál.
Iha fatin hanesan Xefe Suku Leber, Joanico da Silva apresia Xefe Estadu nia presenza iha sira leet no Xefe Suku ne’e relata mós preokupasaun kona-ba bee moos, eletrisidade iha Suku Leber ne’ebé seidauk asesu ho uma-kain 195 resin inklui problema sosiál seluk.
‘’Ho Labarik na’in tolu ohin Xefe Estadu mai iha ami nia le’et. ami apresia tebes tanbá kondisaun nune’e, estrada grave tebes, ne’ebé ami aproveita hato’o ami-nia preokupasaun sira,’’ Joanico da Silva dehan.
Enkuantu iha Leber, Prezidente Repúblika Horta mós fó apoiu sosiál hanesan fós no nesesidade báziku seluk ba família vulnerável sira hamutuk família 20-resin.
Jornalista : Mariano Do Santos Abi
Editor : Orlando Magno
