UPM Salva Funsionáriu Na’in-4 Husi Dezastre Iha Tasi Klaran

banner 120x600

(Dili) Mudansa – Polísia Nasionál Timor-Leste (PNTL) liu husi Unidade Polisia Maritima (UPM), halo abordajen iha tasi klaran konsege salva funsionáriu na’in 4 nia vida iha tasi klaran parte Hera Dili.

Komandante Unidade Polísia Marítima (UPM), Superintendente, Eugenio Pereira informa. nia parte evakua ona vítima sira no mós dadaun ne’e vítima na’in 4 refere iha ona rai maran.

“hafoin simu informasaun iha tuku 17:15, ita orienta membru sira halo kedas intervensaun hodi salva funsionáriu na’in-4 ne’ebé durante ne’e servisu iha Sekretaria Estadu Ambiente (SEA) ohin hetan dezastre iha tasi klaran parte Hera bainhira halo viajen ho ró husi diresaun Metinaru mai sional Dili,” Esplika Eugenio Pereira, via telefone iha loron sábadu ne’e. (29/04/2023).

Nia afirma, vítima sira ho kondisaun di’ak hotu tanba membru UPM halo intervensaun ho lalais hodi fornese servisu salva marítimu nian.

“Sira hetan dezastre tanba impaktu hosi korenti tasi ne’ebé boot halo engine ho medida 40 PK monu sai hosi ró nia body enkuantu ita-nia membru ho ekipa tékniku sira uza skypier hosi MV-1 konsege lori sai vítima na’in 4 ba rai maran ho situasaun ondas ne’ebé boot”, Eugenio haktuir.

Komandante UPM ne’e alerta ba públiku atu kontaktu lalais ba Unidade Polisia Marítima hodi buka ema ne’ebé lakon iha tasi laran ka sai nu’udar vítima asidente marítimu nian.

“Ita nafatin servisu fó asisténsia ba kualkér ema ne’ebé hetan susar iha tasi laran tanba ne’e alerta nafatin ba públiku atu informa lalais mai polísia ne’ebé besik hodi nune’e ita bele salva ema ne’ebé hasoru problema ka presiza tulun ho lalais” nia hakotu.

Jornalista : MediaMudansa

Editór        : Orlando Magno

banner 325x300