(Dili) Mudansa – Pintor Avellino Lourenço Pires, deside hakotu nia estudu iha univesidade balun tanba afeita moras apenis, bainhira Avellino rekupera husi moras apenis nia kontinua envolve an iha grupu Gembel Arte Collective iha tinan 2019.
Avellino Lourenço Pires orijen husi Suku Uma-Boco, Postu Administrativu Natarbora, Munisípiu Manatutu, remata nia Ensinu Sekundaria Jeral iha tinan 2017, no kontinua estuda fali iha Universidade maibé para de’it iha klaran, tanba hetan moras apenis.
Maski hetan tiha moras ba deskansa de’it iha uma, maibé Avellino nunka lakon oportunidade atu kontinua buka dalan oinsá mak bele hala’o atividade iha área arte pintór nian.
“Iha altura ne’eba ha’u komesa pinta halimar ema nia foto, maski haree ladún kualidade maibé grasas adeus iha ema balun rekuesta (pesan) atu pinta imajen, husi ida-ne’e ha’u hahú hetan osan oituan, tuir kualidade ne’ebé iha, dala ruma ema fó $.1.00 lae $.1.50 no boot liu mak $.5.00,” dehan nia ba média mudansa iha nia hela fatin Bekusi Kraik, sesta 28/04/2023..
Husi esforsu an ida-ne’e, Avellino mós hetan apoiu husi ninia maun, hodi lori nia ba envolve iha Grupu Gembel Arte Collective iha tinan 2019.
“Ha’u-nia estadu sivíl klosan, ha’u remata eskola iha 2017, konsege kontinua duni Universidade maibé para tiha fali tanba hetan moras apenis depois halo tiha operasaun, ha’u hili dalan deskansa lai tanba ha’u-nia kondisaun moras,” nia realsa.
Grupu ne’ebé Avellino envolve ba, mezmu matéria arte nian barak, maibé nia deside hili mak área pintór tanba nia iha ona esperiénsia oituan dezde nia estuda iha Ensinu Pre-Sekundariu.
“Durante ha’u kursu ne’e mós iha buat foun ne’ebé ha’u aprende barak, tanba uluk ha’u eskola iha SD, SMP, ha’u hatene pinta duni maibé hatene de’it mak lapis 2B, maibé ha’u tama tiha kursu ne’e ha’u aprende buat barak, oinsá pinta foto iha tais, oinsá pinta foto live direta, oinsá pinta foto ho realistik,”nia konta.
Nia dehan, buat foun ne’ebé nia haree importante loos, mak lapis, tanba bele uza lapis to’o 14B hodi pinta ema nia foto ho kualidade.
“Ha’u sente foun mai ha’u, ho tan tinta ida ropa sira ne’e, ha’u tama kursu iha 2019 nia laran mós ami-nia maun sira seidauk bele fó tinta, ami aprende de’it arsiran, no mós nakukun ho naroman, no perspetiva dook ho besik, transparente iha ninia objetu sira ne’e,” nia hatete.
Enkuantu, bainhira tama tiha iha grupu refere, nia komesa aprende ida-ne’e to’o iha 2020, no parte husi treinadór sira mós komesa haruka sira la’o ba buka fatin pinta rasik no buka rasik nia kór depois barak liu sira komesa pinta ema nia foto live direita iha Kristu Rei.
” Ita ba iha ne’ebá hanesan haree ema tuur hakmatek hela entaun ami husu lisensa hodi bele pinta live direta, iha ne’ebá kleur liu mak 30 minutu, Entaun tuir mai hanesan ne’e hela de’it, ha’u sente hanesan ha’u-nia obra ida uluk ho agora diferente loos. oinsá kahur tinta oinsá pinta ema nia oin, no oinsá labele gasta tinta barak, Tanba kada tinta ida ne’e $45.00,”nia haktuir.
Portantu, imajen dahuluk ne’ebé Avellino konsege pinta iha tais to’o susesu ne’e, mak Santo António, tuir fali mak amu ida husi Same, no tuir tan mak ninia biin nia imajen, inklui sira seluk tan.
Durante envolve an iha grupu refere, Avellino mós marka ona istória balun tanba nia hetan primeiru lugár iha kompetisaun balun ne’ebé nia kompete.
“Kompetisaun sira ne’ebé ha’u tuir ne’e primeiru ha’u la hetan juara, kompetisaun segundu iha Xanana Reading room ne’e mak ha’u okupa terseiru lugár, hetan prémiu no osan dolar $.100.00, tuir mai iha Lahane hetan segundu lugár iha kompetisaun maibé la iha prémiu, no mós ida seluk hetan primeiru lugár iha Festival Ataúro ho prémiu osan $.600.00,” nia hatete.
Aleinde ne’e, nia ba servisu hamutuk ho fundasaun Azia halo ilustrasaun kona-ba diferente entre nasaun Timor-Leste ho nasaun sira seluk.
“Ohin loron osan balun ne’ebé ha’u hetan husi arte nian ne’e ha’u konsege sosa duni transporte hanesan motorizada ida, no mós uza balun ba selu alin nia eskola, inklui uza balun ba selu kost kada fulan,”afirma nia.
Avellino iha esperansa, ba futuru nia sei esforsu an hodi aprende barak liu tan nune’e bele sai ema pintór ida ne’ebé kualidade tanba ne’e nia husu ba joven sira atu kontribui ba nasaun ida ne’e, la presiza halo buat barak, maibé importante mak joven sira tenke hadomi sira nia an.
“Nuudar joven Labele halo problema, bainhira ita hadomi ita-nia an, maibé tenke badinas estuda, no prende iha área oioin tanba grupu arte loke odamatan ba joven se de’it maka hakarak aprende sai pintór, entaun joven ne’ebé furak bainhira halo ninia nasaun furak liu husi esforsu an ne’ebé furak no murak,” nia hakotu.
Klik link hodi akompaña programa podcast, dadalia hamutuk ita nia bainaka Avellino Lourenço Pires
https://www.youtube.com/watch?v=gnbL5x0kSP8&t=6s
Jornalista : Julião da Silva/Estajiáriu Marcelino F. Soares
Editór : Orlando Magno
