(Dili) Mudansa – Dadersan madrugada rona manu nia lian iha ai leten, hanesan mós alaram ida ne’ebé fanu inan feto ida hodi prepara an atu luta ba moris hodi moris iha loron ida no ba nafatin maski ema balu sei toba hakmatek hodi sente mahobeen nia malirin iha dukur.
Inan feto ida, hanesan mós Negosiante ambulante ho naran Cesalstina Maria Soares bainhira tuku 05:00 dadeer-saan tenke foti ain hakat sai husi odamatan leba no tutur sasán hodi fa’an iha terminál tasi tolu tanba nesesidade uma laran mak obriga inan feto ne’e la hakmatek iha oras madrugada.
“Tuku 05:00 dadeer-saan ha’u komesa sai ona husi uma mai fa’an iha ne’e, iha ne’e dala ruma han dala ruma mós la han to’o tuku 08:00 kalan fila ba uma mak ami han hamutuk, maibé hirak ne’e nunka atu hamate ha’u-nia vontade tanba ida ne’e mak realidade moris entaun ha’u nunka sente kolen no hamlaha bainhira luta ba ita-nia moris,” dehan Negosiante Cesaltina ba média mudansa iha nia fatin fa’an sasán iha Tasi Tolu Dili, kinta, 02/02/2023.
Inan feto Cesaltina Maria, tinan 52 orijen husi munisípiu Ermera postu administrativu Letefoho, daudaun ne’e nia hela iha aldeia 12 novembru suku Komoro, postu administrativu Dom Aleixu munisípiu Dili.
Inan feto bonita ne’e, iha oan na’in 8 kompostu husi feto na’in 4 no Mane na’in 4 entre, na’in ualu ne’e na’in lima forma ona família no na’in tolu mak seidauk maibé sira na’in tolu remata de’it iha eskola primária tanba atu kontinua ba pre-sekundária maibé kbiit la to’o hodi suporta sira na’in tolu.
Loron ohin la hanesan ho loron aban tanba realidade ne’ebé mosu ba inan feto ne’e maka dala ruma sasán ne’ebé nia fa’an la iha folin tanba menus kompradór halo nia triste liu tan mak ema la sosa produtu ne’e to’o dodok soe de’it.
“iha parte ida ha’u sente triste tanba sasán hirak ne’ebé mak ha’u Fa’an ema la sosa to’o dodok lori fila ba uma hodi soe de’it, ida ne’e mak realidade ne’ebé hatudu ona maibé durante ne’e tanba ha’u hahú fa’an iha ne’e iha tinan 2006 to’o agora,” nia konta.
Produtu ne’ebé inan feto bonita fa’an ne’e la’ós prodús arsip maibé nia sosa tutan husi ema seluk mak fa’an fali hodi hetan osan uitoan mak bele sustenta moris loron ida nian tanba tuir nia kada loron bele hetan dolar lima ou bele menus husi dolar lima durante halo negósiu husi dadeer to’o kalan
José dé Deus kaben Husi Cesaltina Soares haktuir, durante ne’e nia la servisu maibé iha de’it uma no dala ruma nia ajuda de’it ferik oan fa’an iha merkadu Tasi tolu, tanba Jose nia kondisaun moras hela, maibé antes ne’e José servisu suru rai-henek iha mota Comoro.
“Antes ne’e ha’u suru rai-henek iha mota Comoro, maibé iha momentu ne’ebá derrepente de’it ha’u monu tun tiha ba rai-henek hamriik mós ladi’ak, sira lori ha’u ba ospitál baixa fulan tolu resin tan ne’e mak agora ha’u iha de’it uma dala tanba kondisaun mak la permite ha’u atu halo servisu,” José Konta
Jornalista : Domingas Viana
Editór : Orlando Magno
