(Dili) Mudansa – Konsellu Ministru (KM), aprova ona projetu Dekretu-Lei, ne’ebé aprezenta husi Vise-Ministra Solidariedade Sosiál no Inkluzaun, Signi Chandrawati Verdial, ba kriasaun apoiu pontuál ba vulneravel sira.
Objetivu husi diploma ida ne’e atu halo kriasaun apoiu sira ne’ebé atribui husi Estadu ba individu no família sira iha situasaun estrema vulnerabilidade sosiál, hodi garante satisfasaun ba nesesidade bázika durante prosesu reinsersaun sosiál nian.
“Apoiu ida-ne’e sei atribui, pontualmente ba individu no família sira ne’ebé hasoru situasaun estrema vulnerabilidade temporáriu, ho forma hanesan bens alimentár, bens naun- alimentár sira husi nesesidade báziku ba uza pesoál, bens husi nesesidade báziku ba uzu doméstiku, apoiu pekuniáriu no apoiu psikososiál,”Media Mudansa Sita Komunikadu Imprensa, Kuarta 25/01/2023.
Tipu apoiu públiku ne’ebé atribui no ninia montante depende ba avaliasaun husi situasaun vulnerabilidade sosiál husi profisionál departamentu governamental responsavel husi asisténsia sosiál nian.
Montante ba apoiu pekuniáriu ne’e labele liu husi dolar amerikanu 500, exetu iha situasaun sira translasaun ba mate-isin sira ho montante másimu ne’ebé fiksa ona ho dolar amerikanu 5.000.
Jornalista : Esperança Morteiro Soares
Editor : Orlando Magno
