(Dili), Mudansa – Irmán na’in tolu husi kongregasaun Carmelita simu votus perpetua no konsagra totalmente sira nia an ba maromak no sai fiel nafatin ba sira nia komprimisiu ne’ebé mak ohin hakotu ona iha na’i Maromak nia futar oin.
Irmán na’in tolu ne’ebé mak ohin simu votus perpetua mak, Ir. Salustiana Lourdes de Andrade H.Carm, Ir.Mariana Soares H.Carm, no Ir.Eva Jose Madeira H.Carm .
Irman Salustiana Lourdes Andrade H.Carm informa, sente haksolok tebes ba loron ida ohin simu votus perpétua maski ema sala na’in maibé maromak iha inisiativa espesiál hili nia atu sai atan hodi serbí kreda.
“Atu dehan de’it katak ho espresaun no mós husi asaun ne’ebé mak iha hatudu katak ha’u haksolok ba loron ida ohin tanba maromak iha inisiativa hili ha’u atu sai nia atan ida hodi serbí kreda iha rai Timor liuliu iha kongregasaun Carmelita”,dehan Ir. Salustiana H.Carm ba jornalista iha kapela S. Jose Fatuhada Tersa feira 14/09/2022.
Irmán Salustiana relata, maski durante ne’e hasoru Dezafius barak maibé dezafius hirak ne’e la halo nia atu monu fiar metin liu ba maromak hodi hasoru dezafiu hirak ne’e .
Iha fatin hanesan Ir. Mariana Soares H.Carm afirma, nia hakarak hili dalan ida ne’e atu tuir jesus atu saran nia an ba na’i maromak atu serbí nia emar sira.
“Ha’u-nia fuan hili dalan ida ne’e no konsagra an hodi tau matan ba jesus nia emar sira, tanba kongregasaun bele simu ha’u atu hola parte iha fatin ida ne’e,” Afirma Ir.Mariana.
Reprezentante família, Padre Henrique de Deus husi parókia Letefoho sente Kontenti tebes wainhira ema sira hakarak hili vida ne’ebé serví ba maromak
“Tempu agora difisil ema atu tuir vida ida ne’e, maibé vida ida ne’e saran an tomak ba maromak, no mundu ne’ebé avansadu iha joven feto ruma brani dedika sira nia vida fó sira nia moris tomak la’ós iha mundu ne’e de’it maibé nia moris iha mundu seluk ne’e grasa,” Pe.Henrique esplika
Pé.Henrique realsa, família sente haksolok tebetebes tanba ho grasa na’i maromak nian hakarak fihir hodi haree joven feto hosi família ne’ebé simples maibé maromak hakarak hili sira.
“Ami família sente katak la soi ba vida sira hanesan ne’e, maibé ami sente maromak hadomi tebes ami maski ami la soi, maibé maromak foti halo soi atu hili husi ami nia leet hodi hola mistériu salvasaun kristu nian,”katak padre Henrique
Mensajen ikus ba irmán na’in tolu, sá mak sira promete ona haka’as an tenke hala’o, tanba Jesus dehan, iha ema ruma kuandu tau lima ba knaar ruma hateke ba kotuk nia la di’ak la soi ba reinu lalehan ne’e duni irmán na’in tolu iha responsabilidade ba buat ne’ebé hatán iha maromak nia oin no hatán ba ema hotu-hotu nia leet buka haka’as an la’o ho maromak buat hotu sei fasil
Jornalista :Domingas Viana
Editór :Orlando Magno
