(Dili), Mudansa – Emprezária Juvita Fernandes informa, nia parte hakarak fa’an produtu diferente ho ema seluk no mós hakarak hamenus importasaun temperus, tan ne’e Juvita deside prodús vitako/masako lokál multi- temperus.
“Ha’u sosa na’an karau, señora, ai-lia no liis, hirak ne’e tau hamutuk prodús sai temperus Masako/Vitako multi- temperus, fa’an iha uma no online maibé antes ne’e, hahú negósiu ho nasi bunkus, haree ema barak fa’an entaun ha’u tenke halo fali buat seluk,” dehan Juvita ba Mudansa.com iha nia rezidénsia Bidau Dili, 09/08/2022.
Juvita reforsa, prodús vitako dala ida ho kuantidade dolar 20/30, rezultadu multi- temperus signifika bele tempra ba modo hotu-hotu inklui bele han ho etu maran maibé ema barak seidauk hatene produtu ne’e.
“Osan ne’ebé ha’u hetan husi produtu vitako/masako, uza ba nesesidade uma laran, sosa ekipamentu produsaun ne’ebé seidauk iha no mós sosa produtu lokál hodi kontinua prodús temperus ne’e,” nia konta.
Juvita argumenta, esperiénsia ne’ebé nia iha la’ós hetan husi formasaun maibé aproveita de’it iha Youtube hodi kompleta nia abilidade iha universidade tanba Juvita estuda kona-ba kímika.
“Ha’u hetan sujestaun barak husi kliente sira ne’ebé servisu iha restorante, atu halo furak liu tan maibé to’o ikus ha’u konsege prodús sai Multi-tempra,” Juvita realsa.
Nia tenik, ema hotu hatene rekursu petróleu maka rekursu ne’ebé la renovavel tanba tempu ida nia sei hotu, entaun sidadaun Timor la bele depende de’it ba ida ne’e maibé hahú agora tenke identifika produtu saida mak joven presiza atu halo.
“Buat ne’ebé agora ha’u halo primeiru tenke buka uluk osan kas kompañia ninia hodi fó servisu ba maluk estudante sira ne’ebé presiza nune’e la bele depende de’it ba inan aman,” Juvita haktuir.
Nia hatutan, Iha fulan juñu 2022, Juvita envolve an iha kompetisaun ne’ebé organiza husi MTCI no UNDP konsege, hetan terseiru lugár iha kompetisaun refere.
“Se iha ideia inovativu keta dada an husi ita-nia esperiénsia bainhira halo negósiu labele rende ba obstákulu tanba ita la hatene buat di’ak mai derrepente, entaun buat ne’ebé mosu iha ita-nia hanoin tenke aplika,” Juvita hakotu.
Jornalista : Orlando Magno
Editór : Felisberto F. da Costa
