(Díli) Cristal– Klinika Sescko Cryelon Susesu (sigla-SCS) Sábadu ne’e distribui sertifikadu ba formandu 78 iha área Emprendedorizmu no Sáude Teknolojia, inklui realiza mós Seminariu ho topíku rua hanesan; Dijitál Marketing, Tradisionál Herbál, Makina Quantum No Iteracare ba estudante sira iha Institutu Superior Cristal.
Diretór Ezekutivu Klinika Sescko Cryelon Susesu Unip. Lda Napoleão Ximenes Hornay, hateten seminariu ohin loron hanesan informasaun baziku ba imi hotu nune’e bele hatene kona-ba oinsá utiliza dijitál marketing ho lo’os bainhira sai promotor ne’ebé di’ak atu inflúensia kliente sira hodi sosa produtu ne’ebé sira fa’an.
“Ohin loron média sosiál dezenvolve no ajuda tebes ita iha dijitál marketing nian, tanba ne’e keta lakon vontade apriende, karik aban bain rua sai ema ne’ebé promotor karik hatene atu inflúensia imi nia kliente sira hodi sosa produtu ne’ebé imi fa’an, mundu agora kompetisaun makas iha setór oin-oin, maibé atu susesu ka la susesu fila fali ba idak-idak nian aan”, Dehan Diretór Ezekutivu SCS, Napoleão Ximenes Hornay iha Salaun Institutu Superior Cristal, Sábado, 27/09/2025.
Diretór ne’e salienta, atividade ne’e la se’es husi moto, missaun no vizaun ne’ebé mak Klinika Sescko Cryelon Susesu iha katak, “ami nia hakarak ita hotu moris ho saudável no dignu”.
“Ami haleu teritóriu Timor-Leste hodi fó informasaun ba iha komunidade hodi hametin saúde baziku ba Timor oan hotu liuhusi fahe informasaun no halo prevensaun ba saúde inklui mós bele halo kurativu, hakbi’it sosiedade liuhusi karidade sosiál ne’ebé Sescko Cryelon Susesu halo hodi rezolve problema sosiál ne’ebé mak iha komunidade nia let, hamenus dezempregu iha sosiedade Timor liuhusi loke kampu traballu ba joven sira, sei la iha limitasaun ba sira ne’ebé hakarak atu servisu”, Dehan nia.
Nia hatutan, hasa’e prestasaun saúde herbál no tradisionál Timor nian atu hapara no kombate moras sira ne’ebé sosiedade sira enfrenta iha sira nia moris loro-loron, bele halo sosiedade moris ho dignu prosperu iha futuru aleinde saúde no ekonomia.
Nune’e nia informa, Klinika Sescko Cryelon Susesu iha Makina teknolojia rua ho naran QRMA (QUANTUM) husi nasaun Jerman no ITERACARE husi nasaun Singapura hodi halo teste moras sira.
“Makina Qrma nia prosesu konsultasaun ne’ebé sei fó sai iha minutu tolu nia laran, benefisiu ita sei hare’e ho matan ba kondisaun ita enfrenta, impaktu ne’ebé halo ita nia kondisaun la saudável alat sei fó sai, alat sei kontrola mós ita nia kondisaun to’o ita di’ak no kondisaun sei di’ak permanente, diferensia mak ita la presija hasai kaben, diet, raan no mi, flexibilidade tau ita nia liman ba iha alat leten bainhira otomatis detekta ka konsultasaun no makina Iteracare bele hadia ita nia kondisaun liuhusi prevensaun no kurativu iha minutu balun nia laran depende ba ita nia eskala kondisaun nian, prosesu terapia atu halo atendementu ba morasa estroke, isin kolen ka kaer servisu todan, rematiku, lumpuh, kolestrol, asam urat, farises, kanotak, ain tuur, ulun moras, rezolve sirkuladaun raan, rekopera selula ne’ebé mate, kaimbra, ruin naksala no mós massage kumu isin lolon”, hatutan nia
Nia mós hato’o mensajem ba Timor oan sira hotu inklui diaspora katak fiar ou la fiar ida ne’e determinasaun iha ema ida-idak, atu prevene aan husi moras, maibé fiar katak pasiente sira ne’ebé mai halo tratamentu iha Klinika Sescko Cryelon Susesu sei rekupara lalais, tanba iha ona testemuña hamutuk rihun tolu-nulu ne’ebé mak rekopera ona, hosi konsumu aimoruk herbal, nafatin fiar Klinika Sescko Cryelon Susesu hodi konsumu, importante tuir nia reseita.
Iha okiziaun ne’e Diretor ne’e apela ba públiku katak, Klinika Sescko Cryelon Susesu loke kursu Emprendedorizmu no Saúde Teknolojia, rejistu no kursu gratuita.
“Kursu refere la iha limitasaun ba estudante sira ne’ebé mak aprende iha área seluk hakarak mai rejistu kona-ba kursu emprendedorizmu no saúde teknolojia no kursu refere gratuita”, Nia hakotu.
Entertantu iha seminariu refere iha mós distribuisaun sertifikadu ba formandu no funsionariu husi Klinika Sescko Cryelon Susesu Unip. Lda (sigla-SCS), no hetan partisipasaun husi Diretór Ezekutivu Klinika Sescko Cryelon Susesu, Napoleão Ximenes Hornay, Reprezentante Reitor Institutu Superior Cristal, senadu no inklui mós estudante Institutu Superior Cristal.
Jornalista: Quito Pereira
Editora: Sandi Belo
