(Díli), Taibesi 27 abril 2026- Depois ukun-an, ema hotu-hotu iha Timor-Leste hahú buka dalan atu sustenta nia moris loro-loron, maibé, iha realidade, la’ós ema hotu iha oportunidade hanesan, liuliu ba ema balu ne’ebé sei hasoru limitasaun iha área negósiu no ekonomia. Iha situasaun ne’e, mosu figura ida ne’ebé marka diferensa Inan faluk Ombelina da Silva, ho vontade atu moris ho dignidade, nia hili merkadu hanesan fatin atu luta ba nia moris.
Tuir negosiante Ombelina da Silva hatete, bainhira nia tau nia sasan iha mesa ki’ik ida, Ombelina la pensa deit kona-ba faan. Nia komprende katak atu hetan konsumidór, presiza liuhusi estratéjia simples maibé importante, hatene didi’ak nia produtu rasik no oinsá atu diferensia ho ema seluk.
“Primeiru importante atu hatene klaru saida mak ita nia produtu ka servisu. Ita tenke komprende saida mak diferensia ita nia produtu ho ema seluk. Se ita bele hatudu valor úniku hanesan presu di’ak, kualidade aas no servisu di’ak, ita sei iha oportunidade boot liu,” nia esplika ho konfiansa ba jornalista sira foin lalais ne’e iha Merkadu Taibesi.
Ba Ombelina, merkadu la’ós deit fatin atu faan produtu. Fatin ne’e sai hanesan “escola moris” ida ne’ebé ensina nia kona-ba perseveransa, oinsá adapta ho mudansa, no liu-liu, oinsá komprende karakter no nesesidade konsumidór sira.
Maibé dalan ne’ebé lori nia to’o iha merkadu la’ós tanba escolla deit. Iha istória ida ne’ebé kle’an liu iha nia desizaun, luta ekonomia uma laran nian.
“Ha’u faan iha ne’e la’ós tan deit ha’u gosta, maibé tanba ekonomia uma laran la sufisiente atu sustenta ha’u nia moris loroloron,” nia hateten ho laran metin.
Iha nia mesa, la iha produtu importadu ka sasan barak. Ombelina hili atu faan bua, la’ós bua ne’ebé sosa husi ema seluk, maibé husi nia rai rasik. Kada fruta ne’ebé nia tau iha merkadu, lori mós nia kosar ben no tempu iha to’os.
“Bua ne’e ha’u maka kuda rasik. Ha’u lori mai merkadu atu faan hodi sustenta ha’u nia moris,” nia dehan.
Maski rezultadu la boot, Ombelina simu ho gratidaun. Kada loron, nia bele hetan osan entre $7.50 to’o $10.00, kuantidade ida ne’ebé bele hanesan ki’ik ba ema balun, maibé ba nia, signifika han, bee-mós no presiza nesesidade báziku sira.
“Husi faan ne’e, ha’u hetan osan uitoan-uitoan, maibé bele ajuda duni ha’u nia moris loro-loron nian,” nia hatete.
Istória Ombelina nian hatudu realidade barak iha merkadu Timor-Leste, feto barak, liu-liu inan faluk, luta loro-loron atu sustenta família ho meius simples. Maibé iha laran ne’e, mosu forsa ida korajen atu la hakotu no vontade atu kontinua.
Iha leten mesa ki’ik ida iha merkadu, Ombelina la’ós deit negosiante. Nia mos simbolu reziliénsia no esperansa, prova katak husi buat ki’ik hanesan bua, bele mos hari’i moris ida ho dignidade.
Jornalista/estajiaria : Domingas da costa
Editor : Francisco Pereira
