(Díli), Taibesi 29/05/2026 – Maske atividade negósiu iha Merkadu Taibesi kontinua lao no ajuda sustenta ekonomia família sira, maibe iha vendedór lokal balun konfirma katak sira sei hasoru difikuldade oioin, liu-liu kona-ba organizasaun fatin fa’an ne’ebé seidauk di’ak no menus fasilidade atu apoia atividade komersiál sira.
Tuir negosiante Marcelio Ximenes, vendedór sira kontinua hatudu espíritu servisu no esperansa bo’ot hodi sustenta ekonomia família, maske enfrenta dezafiu loron-loron iha merkadu. Problema bo’ot ne’ebé sira hasoru mak fatin fa’an ne’ebé seidauk organiza ho di’ak, menus espasu adekuadu no fasilidade limitadu ne’ebé afeta movimentu negósiu no konfortu konsumidór sira.
“Ami kontinua fa’an hodi sustenta família, maibé ami sei enfrenta problema barak hanesan fatin fa’an ne’ebé seidauk organiza ho di’ak no kondisaun merkadu ne’ebé dala barak difikulta movimentu negósiu,” dehan Marcelio Ximenes iha Merkadu Taibesi, foin lalais ne’e.
Nia esplika katak bainhira udan ka merkadu nakonu tebes, vendedór sira susar atu organiza sasán no atende konsumidór ho di’ak. Kondisaun ne’e dala barak halo konsumidór sira la sente konfortável atu sosa tanba espasu limitadu no movimentu ema ne’ebé aas.
“Bainhira udan ka merkadu nakonu tebes, ami susar atu organiza fatin fa’an. Dala barak konsumidór sira la confortável atu mai sosa tanba espasu limitadu no movimentu ema barak,” hatete nia.
Marcelio mós revela katak aumentu folin manu iha semana ikus ne’e la’os tanba vendedór sira hakarak aumenta folin arbitrariamente, maibé tanba kustu forñesimentu no transportasaun husi munisípiu sira aumenta maka’as. Tuir nia, maioria manu lokal sira lori mai husi área rural no presiza tempu no gastu boot atu to’o iha Merkadu Taibesi.
“Kustu transporte agora aas liu, no hahán manu mos sasa’e. Ida-ne’e mak halo ami labele fa’an ho folin tun tanba se lae ami mós lakon,” dehan Marcelio.
Maske folin manu sa’e, konsumidór balun kontinua mai sosa tanba manu konsidera nu’udar nesesidade importante ba família sira, liu-liu ba seremonia, festa família no konsumisaun loron-loron. Marcelio espera katak governu bele fó atensaun ba kondisaun merkadu no ajuda organiza fatin fa’an sira atu vendedór no konsumidór bele sente confortável liu.
“Ami hakarak de’it kondisaun merkadu di’ak liu tanba se fatin organiza di’ak, konsumidór sira mos sei gosta mai sosa no negósiu bele lao di’ak,” hatete nia.
Nia mós hatutan katak negósiu ida-ne’e hahú ho kapitál ki’ik hamutuk US$50 de’it. Maske hahú ho kapitál limitadu, nia kontinua esforsu no iha vontade forte atu desenvolve nia negósiu. Agora daudaun, nia sente katak rendimentu komesa aumenta kompara ho tempu uluk, maski dezafiu sira sei eziste nafatin.
Jornalista Estajiada: Caryn Camões / Dina
Editor : Ana Maria da Silva
